विजेचा धक्का लागून युवकाचा मृत्यू

चिक्कोडी : विजेचा धक्का लागून 28 वर्षीय व्यक्तीचा मृत्यू झाला. बेळगाव जिल्ह्यातील चिक्कोडी तालुक्यातील जोडकुर्ली गावात ही घटना घडली आहे.

पवन माने  असे वीज धक्क्याने मरण पावलेल्या युवकाचे नाव आहे.

मिळालेल्या माहितीनुसार, पवन माने हे जोडकुर्ली गावात टायरचे दुकान चालवत होते. नेहमीप्रमाणे रात्रीचे काम आटोपून ते दुकान बंद करत असताना विजेचा धक्का लागून त्यांचा मृत्यू झाला. 
दुकानातील शॉर्ट सर्किट किंवा जुन्या वायरिंगमुळे वीज प्रवाहित झाल्याने ही घटना घडली असावी असा प्राथमिक अंदाज व्यक्त करण्यात येत आहे.

घटनेची माहिती मिळताच कुटुंबीयांनी तसेच ग्रामस्थांनी घटनास्थळी धाव घेतली. या दुर्दैवी घटनेमुळे परिसरात हळहळ व्यक्त होत आहे. घटनेची माहिती मिळताच स्थानिक पोलिस आणि हेस्कॉमचे अधिकारी घटनास्थळी दाखल झाले. त्यांनी पंचनामा करून घटनेची पाहणी केली असून, मृत्यूचे नेमके कारण निश्चित करण्यासाठी पुढील तपास सुरू आहे.