निपाणीत 7 लाखांच्या ऐवजावर चोरट्याचा डल्ला

निपाणी : शहरातील पंत मंदिराजवळ असलेल्या पूजा इलेक्ट्रिकल मोटर सेल्स अँड सर्व्हिस या दुकानात अज्ञात चोरट्याने चोरी करत सुमारे 7 लाख रुपयांचा ऐवज लंपास केल्याची घटना उघडकीस आली आहे. हा संपूर्ण प्रकार सीसीटीव्ही कॅमेऱ्यात कैद झाला आहे.
यर्नाळा गावचे रहिवासी महावीर पत्रावळे यांचे पंत मंदिर परिसरात दुकान असून ते जनरेटर दुरुस्ती, वायरिंग, मोटार व पंप दुरुस्ती तसेच विक्रीचा व्यवसाय करतात. पहाटेच्या सुमारास चोरट्यांनी दुकानाच्या मागील बाजूची काच फोडून लोखंडी गज वाकवले आणि आत प्रवेश केला.
दुकानातील नवीन व जुने तांब्याचे वायर, दुरुस्तीसाठी ठेवलेल्या मोटारी, नवीन मोटारी तसेच इतर साहित्य असा एकूण सुमारे 7 लाख रुपयांचा ऐवज चोरट्यांने चोरून नेला. सकाळी महावीर पत्रावळे दुकान उघडण्यासाठी आल्यावर चोरीचा प्रकार निदर्शनास आला.
 या प्रकरणी महावीर पत्रावळे यांनी निपाणी शहर पोलीस ठाण्यात तक्रार दाखल केली असून पोलिसांनी तपास सुरू केला आहे.
स्थानिक व्यापाऱ्यांमध्ये या घटनेमुळे भीतीचे वातावरण निर्माण झाले असून परिसरात पोलीस गस्त वाढवण्याची मागणी होत आहे.