बेळगाव : बंद घराचे कुलूप तोडून घरातील सोन्या- चांदीचा ऐवज लांबविणाऱ्या घरफोड्याच्या मुसक्या आवळल्या आहेत. घरफोडीनंतर अवघ्या 15 दिवसांत चोरट्याला मुद्देमालासह जेरबंद करणाऱ्या मारिहाळ पोलिसांचे कौतुक होत आहे.
विश्वनाथ दुर्गप्पा मुत्तूर (वय 26, रा. बेविनमुट्टी, ता. जि. बागलकोट) असे चोरट्याने नाव असून त्याने 10 मे 2026 रोजी
मरिहाळ पोलीस ठाणे हद्दीतील शिंदोळी गावातील महालक्ष्मीपूरम नगर येथे बंद घराचे कुलूप तोडून घरात प्रवेश करीत घरातील ट्रेझरीमध्ये ठेवलेला सोन्या- चांदीचा किमती ऐवज लांबविला होता.
घरफोडीच्या वाढत्या घटनांच्या पार्श्वभूमीवर पोलिसांनी विशेष पथक स्थापन करून घरफोडयांचा तपास चालविला होता. दरम्यान 25 मे रोजी शिंदोळी गावातील इंडालनगर परिसरात गस्त घालत असताना एक संशयित व्यक्ती पोलिसांच्या हाती लागली. चौकशीवेळी त्याच्याकडून समाधानकारक उत्तरे न मिळाल्याने पोलिसांना खाक्या दाखवावा लागला. यानंतर त्या संशयिताने आपले कारनामे उघड करताना शिंदोळी येथील घरफोडीचीही कबुली दिली.
आरोपीविरुद्ध यापूर्वीही मरिहाळ पोलीस ठाण्यातील तीन तसेच काकती पोलीस ठाण्यातील एका घरफोडीच्या गुन्ह्याची नोंद असल्याचे तपासात उघड झाले आहे.
पोलिसांनी आरोपीकडून सुमारे 134 ग्रॅम सोन्याचे दागिने, 510 ग्रॅम चांदीचे दागिने आणि अन्य मुद्देमालासह एकूण 23 लाख रुपयांचा ऐवज जप्त केला आहे.
#burglary
#marihalpolice
#crime
#burglararrest
