पाण्याच्या खड्ड्यात पडून दोन चिमुकल्यांचा गेला जीव

धारवाड : घर बांधकामासाठी खोदलेल्या पाण्याच्या खड्ड्यात पडून दोन मुलांचा जीव गेला.
धारवाड तालुक्यातील मन्सूर गावात बुधवारी रात्री उशीरा ही घटना घडली आहे.

कुमार निंगप्पा मुदकन्नावर (वय 7 ) आणि प्रथम उळळागड्डी (वय 7 ) अशी पाण्याच्या खड्ड्यात पडून मरण पावलेल्या मुलांची नावे आहेत.

प्रथम हा धारवाडमधील सत्तूर येथील रहिवासी असून तो सुट्टीसाठी आपल्या आजोळी आला होता. बुधवारी संध्याकाळी प्रथम आणि कुमार खेळण्यासाठी बाहेर गेले होते. रात्री उशिरापर्यंत ते घरी परत न आल्याने कुटुंबीयांनी त्यांचा शोध सुरू केला.
दरम्यान, गावातील एका व्यक्तीने घर बांधण्यासाठी पाण्याचा खड्डा खोदला होता. त्या खड्ड्यात दोन्ही मुले पडलेली आढळून आली. पाण्यात बुडाल्याने दोघांचाही मृत्यू झाला होता.
धारवाड ग्रामीण पोलीस ठाण्यात या घटनेची नोंद झाली असून पुढील तपास सुरू आहे.