ट्रकांची धडक आणि आगीचा भडका; वाहने जळून खाक

कित्तूर : तालुक्यातील एम. के. हुबळी परिसरातील राष्ट्रीय महामार्ग-48 वर दोन वाहनांची धडक होऊन भीषण आग लागली. या मध्ये दोन्ही वाहने जळून खाक झाल्याची घटना शुक्रवारी मध्यरात्री घडली. सुदैवाने या अपघातात चालक बचावले असून कोणतीही जीवितहानी झालेली नाही.
मिळालेल्या माहितीनुसार, बेळगावच्या दिशेने मका पोत्यांची वाहतूक करणारा ट्रक जात असताना समोरून भरधाव वेगाने येणाऱ्या दूध टँकरने त्याला धडक दिली. धडक इतकी प्रचंड होती की दोन्ही वाहनांमध्ये आग लागली आणि काही क्षणांतच आगीने रौद्र रूप धारण केले.
घटनेची माहिती मिळताच अग्निशमन दलाच्या जवानांनी घटनास्थळी धाव घेऊन आग आटोक्यात आणली. मात्र, आग विझवेपर्यंत दोन्ही वाहने  पूर्णपणे जळून खाक झाली होती.