चोरट्यांनी चोरी केल्यानंतर पुरावे नष्ट करण्यासाठी पेटवले घर ..!

कोलार : चोरट्यांनी एका गरीबाच्या घरात चोरी केली आणि ऐवज लंपास केल्यानंतर पुरावे नष्ट करण्यासाठी घराला आग लावून घरच पेटवून दिले. चोरट्यांच्या या निर्दयीपणामुळे एक संसार उघड्यावर आला.
कोलार जिल्ह्यातील मल्लसंद्र गावात ही घटना घडली आहे.

मल्लसंद्र गावातील शारदम्मा ह्या कार्यक्रमानिमित्त बाहेरगावी गेल्याची संधी साधून चोरट्यांनी मध्यरात्री तिच्या घराचा कडी कोयंदा तोडून घरात प्रवेश केला. घरात शिरलेल्या चोरट्यांनी घरातील तिजोरीचे लॉकर फोडून त्यातील रोकड आणि सोन्याचे दागिने लंपास केले.
लाखो रुपयांचे दागिने आणि रोकड लुटल्यानंतर फिंगर प्रिंट आदी पुरावे नष्ट करण्यासाठी घरालाच आग लावून घर पेटवून दिले.
शारदम्मा ही उदरनिर्वाहासाठी चहाचे दुकान चालवते. घरातील रोख रक्कम, सोन्याचे दागिने चोरीनंतर घर पेटवून दिल्याने एक गरीब कुटुंब आता अक्षरशः उघड्यावर आले आहे.
आगीच्या भक्ष्यस्थानी घरातील किराणा सामानासह सर्व आवश्यक वस्तू जळून खाक झाल्या. या प्रकरणाची नोंद वेमागल पोलीस स्थानकात करण्यात आली असून, पोलिसांनी घटनास्थळी भेट देऊन तपास सुरू केला आहे.