चोरट्यांचा मजेशीर प्रताप : विद्यापीठाची वायरिंगच नेली उखडून 

धारवाड : चोरटे काहीही चोरून नेऊ शकतात बरं का. कधी बंद घराचा कडी-कोयंडा उचकटून घरातील सोन्या-चांदीचे दागिने आणि रोकड, तर ग्रामीण भागात शेतीला आणि विहिरीला लावलेल्या विद्युत मोटारी. पण धारवाड मध्ये चोरट्यांनी चक्क विद्यापीठातील इमारतीच्या वीज पुरवठा करणाऱ्या वायरच उचकटून नेल्या. यामुळे विद्यापीठाच्या एका विभागाला अंधारात राहावं लागलं आहे.

धारवाड येथील कर्नाटक विद्यापीठाच्या विस्तीर्ण कॅम्पसमध्ये वारंवार होणाऱ्या चोरीच्या घटनांमुळे विद्यापीठाची प्रतिमा मलिन होत आहे. नुकत्याच घडलेल्या एका धक्कादायक घटनेत कन्नड अभ्यास विभागात चोरी होऊन संपूर्ण इमारत अंधारात बुडाली आहे.
आर. सी. हिरेमठ यांच्या कन्नड अध्ययन पीठाचे अलीकडेच लाखो रुपये खर्च करून डिजिटायझेशन करण्यात आले होते. अशा महत्त्वाच्या विभागात ही चोरी झाली. विभागातील साहित्य चोरीला गेले नसले तरी चोरट्यांनी संपूर्ण इमारतीतील वीजपुरवठ्याची वायरिंगच उचकटून नेली आहे.
चोरट्यांनी भूतळ (ग्राऊंड फ्लोर) तसेच वरच्या दोन मजल्यांवरील सर्व विद्युत वायर काढून नेल्याने संपूर्ण इमारतीचा वीजपुरवठा खंडित झाला आहे. त्यामुळे विद्यार्थी व कर्मचारी यांना अंधारातच काम करावे लागत आहे. याशिवाय विभागातील नळही चोरीला गेले आहेत.
या घटनेनंतरही विद्यापीठ प्रशासनाने अद्याप पोलिसांत तक्रार दाखल केलेली नाही, यामुळे विद्यार्थ्यांतून संताप व्यक्त केला जात आहे. या चोरीमुळे कॅम्पसच्या सुरक्षेबाबत गंभीर प्रश्न उपस्थित झाले आहेत.
दरम्यान, इमारतीतील पुरुषांच्या स्वच्छतागृहाजवळील व्हेंटिलेटरला लावलेली जाळी पूर्वीच तोडण्यात आली होती. त्याच मार्गाने चोरट्यांनी प्रवेश केला असावा, अशी शक्यता व्यक्त केली जात आहे.
विशेष म्हणजे, विद्यापीठाच्या सुरक्षेसाठी खासगी सुरक्षा संस्थेला करार देण्यात आला असून, शंभराहून अधिक सुरक्षा रक्षक तैनात आहेत. तरीही अशी चोरी होणे आणि त्यानंतरही प्रशासनाकडून कोणतीही ठोस कारवाई न होणे, यामुळे सुरक्षा व्यवस्थेवर प्रश्नचिन्ह निर्माण झाले आहे.
आधीच आर्थिक अडचणीत सापडलेल्या कर्नाटक विद्यापीठासाठी अशा घटना अधिकच डोकेदुखी ठरत आहेत. चोरीच्या प्रकरणाची तातडीने चौकशी करावी, अशी मागणी केली जात आहे.