नरेगाची मजुरी लाटण्यासाठी चक्क पुरुषांनी नेसल्या साड्या

यादगीर : ' प्रेमासाठी वाट्टेल ते ' असं खूपदा ऐकलं असेल पण हल्ली ' पैशासाठी वाट्टेल ते ' असा प्रकार कोणत्या ना कोणत्या कारणाने पहावयास आणि ऐकावयास मिळतो आहे. असाच प्रकार यादगीर जिल्ह्यातील मल्दार गावात पहावयास मिळाला.

नरेगाची मजुरी लाटण्यासाठी पुरुषांना साडी नेसवून चक्क महिला बनविण्यात आले. महात्मा गांधी ग्रामीण रोजगार हमी योजनेच्या (नरेगा) अंतर्गत मजुरी रक्कम हडप करण्यासाठी पुरुषांना साडी नेसवून महिलांच्या नावावर काम दाखवण्याचा प्रकार उघडकीस आल्यानंतर प्रशासनही चक्रावले आहे.

जिल्ह्यातील मल्दार गावात सण्णलिंगप्प यांच्या शेतात तीन लाख रुपयांच्या नाल्याच्या साफसफाईचे काम सुरू असून, त्यात मजुरी रक्कम हडप करण्यासाठी पुरुषांना साडी नेसवून महिलांच्या नावाने कामाची नोंद करण्यात आली आहे.
या प्रकरणाचे फोटो सोशल मीडियावर व्हायरल झाल्याने याची राज्यभर चर्चा आहे.

या वृत्ताला जिल्हा पंचायत मुख्य कार्यकारी अधिकारी लविश ओरडिया यांनी दुजोरा दिला असून ही घटना फेब्रुवारी महिन्यात घडली आहे, असे त्यांनी स्पष्ट केले आहे. मिळालेल्या तक्रारीनुसार कारवाई करण्यात आली असून ठेकेदाराला निलंबित करण्यात आल्याचेही त्यांनी सांगितले आहे.
नरेगा योजनेंतर्गत सदर कामासाठी अजून कोणतीही रक्कम वितरित करण्यात आलेली नाही, असेही जिल्हा पंचायत सीईओनी म्हटले आहे.