गळफास घेऊन पीएसआयने केली आत्महत्या ..!

कलबुर्गी : कलबुर्गी येथे एका पोलीस उपनिरीक्षकाने (पीएसआय) घरात गळफास घेऊन आत्महत्या केल्याची धक्कादायक घटना घडली आहे.

बसवराज असे आत्महत्या केलेल्या पीएसआयचे नाव असून ते डीसीआरबी विभागात कार्यरत होते. प्राथमिक माहितीनुसार, कामाच्या तणावामुळे त्यांनी हे टोकाचे पाऊल उचलल्याचा संशय व्यक्त केला जात आहे.

मिळालेल्या माहितीनुसार,  बसवराज यांनी शनिवारी सकाळी त्यांच्या खोलीचे दार बराच वेळ उघडले नाही. कुटुंबियांनी दरवाजा ठोठावूनही दरवाजा न उघडल्याने कुटुंबीयांना संशय आला. त्यांनी दार फोडून आत प्रवेश केला असता बसवराज यांनी गळफास घेऊन आत्महत्या केल्याचे आढळून आले.
बसवराज यांनी आत्महत्या केलेल्या आदल्या रात्री, म्हणजेच शुक्रवारी रात्री आपल्या मित्रांना फोन करून आत्महत्या करणार असल्याचे सांगितले होते, असे सांगण्यात येते. 
घटनेची माहिती मिळताच पोलिसांनी घटनास्थळी धाव घेत पंचनामा केला. आत्महत्येचे नेमके कारण अद्याप स्पष्ट झाले नसून, पोलिसांकडून पुढील तपास सुरू आहे.