कागवाड : दुचाकीला मारुती स्विफ्ट कारने मागून धडक दिल्याने झालेल्या अपघातात 38 वर्षीय महिलेचा जागीच मृत्यू झाला. महानंदा सचिन चौगुले असे अपघातात मरण पावलेल्या महिलेचे नाव आहे.
महाराष्ट्रातील मिरज तालुक्यातील सावळी गावच्या रहिवासी महनंदा सचिन चौगुले ह्या आपले पती सचिन चौगुले (वय 44) यांच्या दुचाकीवरून शेडबाळहून कागवाडकडे जात होत्या. यावेळी कागवाड-शेडबाळ मार्गावरील उप्पारवाडी गावाजवळ सचिन चौगुले यांच्या दुचाकीला त्याच दिशेने जाणाऱ्या मारुती स्विफ्ट कारने मागून जोराची धडक दिली.
या अपघातात महानंदा सचिन चौगुले यांचा मृत्यू झाला. तर दुचाकी चालवत असलेले त्यांचे पती सचिन चौगुले गंभीर जखमी झाले. सचिन चौगुले यांच्यावर मिरज येथील खासगी रुग्णालयात उपचार सुरू आहेत.
