रौडीशीटर्सना खाकीचा दणका ..!

बेळगाव : जिल्ह्यातील रौडीशीटर्सना खाकीने आज चांगलाच दणका दिला. जिल्हा पोलिसांनी आज शनिवारी सकाळी शहर व परिसरातील रौडीशीटर्सविरोधात धडक कारवाई करत त्यांच्या घरांवर छापे टाकून झाडाझडती घेतली.
बेळगाव जिल्ह्यातील गोकाक शहरात डीवायएसपी, सीपीआय, पीएसआय तसेच पोलिस कर्मचाऱ्यांच्या पथकाने 10 रौडीशीटर्सच्या घरांवर एकाचवेळी धाड टाकून तपासणी केली. विविध गुन्हेगारी कृत्यांमध्ये सहभागी असलेल्या तसेच कायदा व सुव्यवस्थेला बाधा आणणाऱ्या घटकांवर पोलिसांची विशेष नजर असून, त्यांच्या हालचालींवर बारकाईने लक्ष ठेवले जात आहे.
गुन्हेगारी प्रवृत्तीच्या व्यक्तींवर अंकुश ठेवण्यासाठी आणि नागरिकांमध्ये सुरक्षिततेची भावना निर्माण करण्यासाठी अशा कारवाया पुढेही सुरू राहणार असल्याचे पोलिसांनी स्पष्ट केले.