अथणीत होतंय बेकायदेशीर माती उत्खनन ?  मग प्रशासन गप्प का ?

अथणी : अथणी तालुक्यात बेकायदेशीर माती उत्खनन केले जात असल्याची चर्चा कानी पडत आहे. भूमाफियांकडून येथे कोट्यवधी रुपयांच्या मातीची लूट सुरू असल्याचे गंभीर आरोप स्थानिकांकडून करण्यात येत आहेत.

तालुक्यातील विविध भागांमध्ये दिवसाढवळ्या आणि रात्रीच्या वेळीही मोठ्या प्रमाणात मातीचे उत्खनन सुरू असल्याचे सांगण्यात येत आहे. या प्रकारामुळे कायदा आणि सुव्यवस्थेचा पूर्णपणे बोजवारा उडाल्याची भावना नागरिक व्यक्त करत आहेत.
विशेष म्हणजे, इतक्या मोठ्या प्रमाणावर सुरू असलेल्या या गैरप्रकारांकडे प्रशासन आणि लोकप्रतिनिधी दुर्लक्ष का करत आहेत, असा प्रश्न उपस्थित केला जात आहे. 
भूमाफियांचे जाळे इतके मजबूत झाले आहे की, त्यांच्या विरोधात कोणीही उघडपणे बोलण्यास धजावत नसल्याची चर्चा परिसरात रंगली आहे.
बेकायदेशीर माती उत्खननामुळे शासनाच्या महसुलाचे मोठे नुकसान होत असून पर्यावरणालाही धोका निर्माण झाला आहे.अथणी तालुक्यात सुरू असलेल्या या कथित बेकायदेशीर उत्खननाची सखोल चौकशी व्हावी, अशी मागणी नागरिकांकडून होत आहे.