पतीने चिरला पत्नीचा गळा : चारित्र्याच्या संशयातून पडला मुडदा

कोलार : प्रेमविवाह केलेल्या पतीनेच पत्नीची गळा चिरून निर्घृण हत्या केल्याची धक्कादायक घटना मालूर तालुक्यातील मिंडहळ्ळी तलावाजवळ घडली.

योगिनी ( वय 21, राहणार: चिंतामणी, जिल्हा :चिक्कबळ्ळापूर ) असे या घटनेतील दुर्दैवी मृत महिलेचे नाव आहे. तिचा पती गणेश (रा. आवलहळ्ळी, बेंगळूर ग्रामीण जिल्हा) याने हा खून केल्याचे सांगितले जात आहे.
दोन वर्षांपूर्वी योगिनी आणि गणेश यांनी प्रेमविवाह केला होता. योगिनी नरसापूर औद्योगिक क्षेत्रातील एका कंपनीत काम करत होती. अलीकडे गणेशला पत्नीच्या चारित्र्यावर संशय येत असल्याने दोघांमध्ये वारंवार वाद होत होते.
हा वाद विकोपाला गेला आणि गणेशने चाकूने योगिनीचा गळा चिरून मारल्याचे कळते. घटनेची माहिती मिळताच पोलिसांनी घटनास्थळी धाव घेत पंचनामा केला असून पुढील तपास सुरू आहे.