घालून डोक्यावर फेटा कोल्हापुरी .... ठग्यांनं केली पावणे चार लाखांची चोरी .....!!

कोल्हापूर ( bn7 news) : डोईवर कोल्हापूर फेटा परिधान करून पाहुणा बनून आलेल्या भामट्याने 42 ग्रॅम वजनाचे अंदाजे 3 लाख 78 हजार 470 रुपये किमतीचे सोन्याचे दागिने घेऊन पोबारा केला. कोल्हापुरात ही घटना घडली आहे.

जय पॅलेस, कळंबा आणि सृष्टी फार्म हाऊस, हणबरवाडी, कोल्हापूर येथील मंगल कार्यालयांत लग्न समारंभासाठी पाहुणा बनून आलेल्या एका ठकसेनाने अंदाजे 3 लाख 78 हजार 470 रुपये किमतीचे सोन्याचे दागिने गुंडाळून पलायन केले.
बाळासो उर्फ अजित प्रकाश पाटील (वय 28, रा. आदमापूर, ता. भुदरगड, जि. कोल्हापूर) असे त्या भामट्याचे नाव असून सुरुवातीला उडवाउडवीची उत्तरे देणाऱ्या भामट्याने पोलीस चौकशीत चोरीची कबुली दिली आहे. धक्कादायक बाब म्हणजे कोल्हापूर व पुणे येथे घरफोडी व जबरी चोरीचे एकूण 21 गुन्हे त्याच्यावर दाखल असल्याची माहिती समोर आली आहे.

पोलीस अधीक्षक महेंद्र पंडित यांच्या सूचनेनुसार पोलीस निरीक्षक रविंद्र कळमकर यांच्या मार्गदर्शनाखाली पोलीस उपनिरीक्षक जालिंदर जाधव व त्यांच्या पथकाने ही कारवाई केली.
ही यशस्वी कारवाई अप्पर पोलीस अधीक्षक निकेश खाटमोडे-पाटील, डॉ. बी. धीरजकुमार, पोलीस निरीक्षक रविंद्र कळमकर, पोलीस उपनिरीक्षक जालिंदर जाधव, शेषे मोरे आणि त्यांच्या सहकाऱ्यांनी केली.