पैशांच्या वादातून दोघांवर जीवघेणा हल्ला : तिघांविरोधात गुन्हा दाखल

हुबळी : जुन्या हुबळीतील दोघां तरुणांवर पैशांच्या वादातून मारहाण करण्यात आल्याची घटना उघडकीस आली आहे. कर्जाच्या पैशांवरून झालेला वाद विकोपाला जाऊन आरोपींनी जीवे मारण्याची धमकी देत काठीने बेदम मारहाण करण्यात आली. या घटनेत जखमी झालेल्या तरुणांवर हुबळीतील किम्स रुग्णालयात उपचार सुरू आहेत. याप्रकरणी कलघटगी पोलीस ठाण्यात गुन्हा दाखल करण्यात आला आहे.

तक्रारीनुसार, जुन्या हुबळीतील चन्नपेट येथील गफारसाब हा आपल्या मित्र विजय वाळवेकर याच्यासोबत दुचाकीवरून गुडिहाळकडे गेला होता. त्यावेळी उग्नीकेरी-गुडिहाळ रस्त्यावर तिघा युवकांनी विजयला अडवून पैशांच्या कारणावरून वाद घातला. त्यानंतर आरोपींनी काठीने विजयच्या डोक्यावर, पाठीवर, हातांवर आणि पायांवर मारहाण करून गंभीर जखमी केले, असे तक्रारीत नमूद आहे.
भांडण सोडविण्यासाठी मध्ये पडलेल्या गफारसाबलाही आरोपींनी मारहाण केली. तसेच पुन्हा दिसल्यास जीवे मारण्याची धमकी दिल्याचेही तक्रारीत म्हटले आहे.
जखमी विजय वाळवेकर व गफारसाब यांच्यावर किम्स रुग्णालयात उपचार सुरू असून, या प्रकरणी कळप्पा गुडिहाळ, राघवेंद्र जाधव आणि विश्वनाथ कोराव यांच्याविरोधात कलघटगी पोलीस ठाण्यात गुन्हा दाखल करण्यात आला आहे.