बौद्ध भिक्षूच्या खुनाचे धागेदोरे उलघडले : धारवाड पोलिसांनी आवळल्या त्रिकुटाच्या मुसक्या

धारवाड : धारवाड येथील बौद्ध भिक्षूच्या खुनाचे धागेदोरे उलघडण्यात धारवाड ग्रामीण पोलिसांना यश आले असून या प्रकरणी पोलिसांनी त्रिकुटाच्या मुसक्या आवळल्या आहेत.
संकेत यादव (वय 24), वैभव चव्हाण ( वय 30) आणि सिद्धेश भोसले (वय 18) अशी पोलिसांनी खून प्रकरणी अटक केलेल्या त्रिकुटाची नावे आहेत.

तिबेटी मूळ असलेले बौद्ध भिक्षू ताशी धोंडुप (वय अंदाजे 40) यांचा मृतदेह एप्रिल अखेरीस धारवाड बायपासवरील हल्याळ रोडजवळ आढळून आला होता. सुरुवातीला अपघाती मृत्यूचा संशय व्यक्त करण्यात आला होता, मात्र चेहऱ्यावर जखमा आढळल्याने यात काहीतरी काळेबेरे असल्याचा संशय पोलिसांना आला होता. त्याअनुषंगाने पोलिसांनी सखोल तपास सुरू केला आणि या खून प्रकरणी त्रिकुटाला चतुर्भुज केले.

पोलिसांनी ताब्यात घेतलेल्या संशयित आरोपींना खाक्या दाखविला असता त्यांनी केलेल्या कारनाम्याची माहिती दिली.
भिक्षूकडे मोठी रक्कम असल्याचा संशय घेत आरोपींनी बौद्ध भिक्षुचे अपहरण केले. त्यांना कारमध्ये ठेवून पैशांची मागणी करण्यात आली. मात्र पैसे नसल्याचे लक्षात आल्यानंतर आरोपींनी त्यांना मारहाण केली, ज्यात त्यांचा मृत्यू झाला. घाबरलेल्या आरोपींनी मृतदेहाची विल्हेवाट लावून खून पचवण्यासाठी मृतदेह दुसऱ्या ठिकाणी नेऊन फेकून दिला आणि ते काहीकाळासाठी भूमिगत झाले.

या प्रकरणात सुरुवातीला कोणताही ठोस पुरावा नव्हता. मात्र पोलिसांनी विविध ठिकाणचे सीसीटीव्ही फुटेज तपासले आणि हळूहळू या खुनाचे धागेदोरे उलघडू लागले. पेट्रोल पंपावरील फुटेजमुळे तपासाला दिशा मिळाली आणि पोलिसांनी आरोपींचा माग काढला.
पोलिसांनी विशेष पथके तयार करून काही दिवसांच्या अथक प्रयत्नांनंतर आरोपींना अटक करण्यात पोलिसांना यश मिळाले.
या प्रकरणात आणखी काही आरोपींचा सहभाग असण्याची शक्यता असून पोलीस पुढील तपास करत आहेत.