क्षुल्लक कारणावरून मारहाण : पानटपरी चालकाचा मृत्यू

क्षुल्लक कारणावरून मारहाण : पानटपरी चालकाचा मृत्यू

बेळगाव : क्षुल्लक कारणावरून चौघां तरुणांनी केलेल्या मारहाणीत एका 48 वर्षीय इसमाचा मृत्यू झाला. काल मंगळवारी रात्री बोडकेहट्टी ( तालुका - बेळगाव) येथे ही घटना घडली.
याप्रकरणी काकती पोलिसांनी चौघां आरोपींना ताब्यात घेतले आहे.

याबाबत समजलेली माहिती अशी की, प्रज्वल पाटील, निखिल चौगुले, विवेक चौगुले आणि श्रीधर पाटील हे कडोली गावचे चौघे मित्र दड्डी-मोहनगा यात्रेला गेले होते. मंगळवारी रात्री मोहनगा यात्रा आटोपून ते कडोलीला परतत होते. त्यांनी यात्रेत थोडी दारू ढोसली होती. वाटेवर बोडकेहट्टी येथील एका पान टपरीवर सिगारेट फुंकण्यासाठी ते थांबले. सिगारेट घेतल्यानंतर दुकानदार यल्लाप्पा दुर्गप्पा नाईक ( वय 48, राहणार-बोडकेहट्टी, तालुका बेळगाव) यांनी त्या चौघांकडे सिगारेटचे पैसे मागितल्याने त्या चौघांचा पारा चढला आणि त्यांनी दुकानदार यल्लाप्पा याला जबर मारहाण केली आणि पोबारा केला.
मारहाणीत गंभीर जखमी झालेल्या यल्लाप्पा यांना रुग्णालयात नेत असताना वाटेतच त्यांचा मृत्यू झाला.

काकती पोलीस ठाण्यात याप्रकरणी गुन्हा दाखल करण्यात आला होता. पोलिसांनी या प्रकरणी गतीने तपास करीत अवघ्या अर्ध्या तासात प्रज्वल पाटील, निखिल चौगुले, विवेक चौगुले आणि श्रीधर पाटील या चौघां संशयीत आरोपींच्या मुसक्या आवळल्या आहेत. अधिक तपास सुरू आहे.