साखळी अपघातात बीएसएफ जवान आणि अम्ब्युलन्स चालक ठार !

विजापूर : भरधाव वेग आणि निष्काळजीपणाने वाहन चालविल्याने झालेल्या साखळी अपघातात बीएसएफ जवानासह दोघांचा मृत्यू झाला. मौनेश खुबप्पा राठोड (वय 35 ) असे अपघातात मरण पावलेल्या जवानाचे नाव आहे. नीडगुंडी शहराच्या राष्ट्रीय महामार्ग क्रमांक 50 वर हा साखळी अपघात घडला.

मुधेबिहाळ तालुक्यातील कालगी टांडा येथील रहिवासी असणारे मौनेश राठोड हे कालगी टांडाहून नीडगुंडीमार्गे बागलकोट जिल्ह्यातील आलूर टांडा येथे पत्नीला भेटण्यासाठी दुचाकी वरून जात होते. पत्नीला भेटून त्यानंतर ते परत सेनेत दाखल होणार होते. मात्र नीडगुंडी बसस्थानकाजवळ गुजरातहून बंगळुरकडे निघालेल्या एका ट्रकची त्यांच्या बाइकला धडक बसून त्यांचा जागीच मृत्यू झाला.
त्याच ट्रकने पुढे जाऊन एका बसला देखील धडक दिली, मात्र सुदैवाने बसमधील प्रवासी थोडक्यात बचावले. उत्तरप्रदेशमधील एका ॲम्ब्युलन्सलाही ट्रकने जोरदार धडक दिली असून, त्या ॲम्ब्युलन्सचा चालक ऋतीशकुमार कोडा यांचा मृत्यू झाला आहे.
ट्रक चालकाच्या निष्काळजीपणा मुळे हे अपघात होऊन बीएसएफ जवान आणि ॲम्ब्युलन्सचा चालकाला जीव गमवावा लागला.