अपघातात भावाचा जागीच मृत्यू : बहीण गंभीर जखमी

संकेश्वर : बॉक्साईट वाहतूक करणाऱ्या ट्रकची  दुचाकीला जोरदार धडक बसून झालेल्या अपघातात दुचाकीस्वाराचा मृत्यू झाला तर दुचाकीच्या मागील आसनावर बसलेली त्याची बहीण गंभीर जखमी झाली आहे. आप्पासाहेब लाटकर असे अपघातात मरण पावलेल्या व्यक्तीचे नाव आहे. आज सकाळी सुमारे सव्वानऊ वाजण्याच्या सुमारास हिटणी- कणगला मार्गावर ही घटना घडली.

आप्पासाहेब लाटकर हे आज सकाळी सुमारे सव्वानऊ वाजण्याच्या सुमारास आपल्या मोठ्या बहिणीला सोडण्यासाठी दुचाकीवरून म्हसोबा हिटणीमार्गे कणगल्याकडे जात होते. यावेळी मागून भरधाव वेगाने येणाऱ्या बॉक्साईट वाहतूक करणाऱ्या ट्रकने त्यांच्या दुचाकीला जोरदार धडक दिली. या भीषण धडकेत आप्पासाहेब लाटकर यांचा जागीच मृत्यू झाला. तर त्यांच्या बहिणीच्या दोन्ही पायांवरून ट्रकचे चाक गेल्याने त्या गंभीर जखमी झाल्या आहेत. अपघातानंतर त्यांना तातडीने उपचारासाठी रुग्णालयात दाखल करण्यात आले असून त्यांची प्रकृती चिंताजनक असल्याचे समजते.
 अपघातामुळे काही काळ वाहतुकीची कोंडी निर्माण झाली होती.