भरधाव टिप्परच्या ठोकरीने दुचाकीस्वाराचा मृत्यू

खानापूर : भरधाव टिप्परने दुचाकीला दिलेल्या जोरदार धडकेने दुचाकीस्वाराचा मृत्यू झाला. सातेरी बाबाजी गुरव (रा. लोकोळी, तालुका : खानापूर ) असे अपघातात मरण पावलेल्या इसमाचे नाव आहे. 

खानापूर तालुक्यातील लोकोळी क्रॉस येथे आज  शनिवारी सकाळी साडेदहाच्या सुमारास ही घटना घडली.

  सातेरी गुरव हे आपल्या दुचाकीवरून शेताच्या दिशेने जात होते. त्यावेळी पारिश्वाडकडून खानापूरच्या दिशेने वेगाने येणाऱ्या टिप्परने त्यांच्या दुचाकीला जोरदार धडक दिली. या अपघातात सातेरी गुरव गंभीर जखमी झाले. त्यांना उपचारासाठी नेण्यात येत असतानाच वाटेत त्यांचा मृत्यू झाला.
मृतदेह बेळगाव येथील बिम्स रुग्णालयात उत्तरीय तपासणीसाठी ठेवण्यात आला आहे. शवविच्छेदनाची प्रक्रिया पूर्ण झाल्यानंतर मृतदेह नातेवाईकांच्या ताब्यात देण्यात येणार आहे. सातेरी गुरव यांचा मुलगा पंढरपूर येथे देवदर्शनासाठी गेला आहे. तो परतल्यानंतर लोकोळी येथे सातेरी यांच्यावर अंत्यसंस्कार करण्यात येणार असल्याचे समजते.

सातेरी गुरव त्यांच्या पश्चात पत्नी, एक मुलगा आणि दोन विवाहित मुली असा परिवार आहे.