युपीतील 11 चोरट्यांच्या आवळल्या मुसक्या 

बेळगाव : बसमध्ये रेटारेटी करून प्रवाशांच्या बॅगा व दागिने चोरणाऱ्या उत्तर प्रदेशातील 11 चोरट्यांच्या मुसक्या कागवाड आणि अथणी पोलिसांनी आवळल्या आहेत.

सीसीटीव्ही फुटेज आणि गोपनीय माहितीच्या आधारे कागवाड व अथणी पोलिसांनी संयुक्त कारवाई करत या टोळीला जेरबंद केले. या प्रकरणात कागवाड येथे चार, चिक्कोडी येथे एक आणि अथणी येथे एक अशा एकूण सहा चोरीच्या गुन्ह्यांचा उलगडा झाला आहे.
अटक करण्यात आलेले चोरटे बसमधून प्रवास करणाऱ्या चांगले व महागडे कपडे परिधान केलेल्या प्रवाशांना लक्ष्य करत होते. कागवाड, अथणी आणि चिक्कोडी परिसरात बॅग चोरी करणाऱ्या या टोळीकडून पोलिसांनी सुमारे 225 ग्रॅम सोन्याचे दागिने जप्त केले आहेत.
अशा प्रकारच्या गुन्ह्यांना आळा घालण्यासाठी येत्या काळात बसमध्ये सीसीटीव्ही कॅमेरे बसविण्याचा विचार करण्यात येत असून, साध्या वेशातील पोलिस कर्मचारीही प्रवाशांच्या सुरक्षेवर लक्ष ठेवतील, अशी माहिती पोलिस अधीक्षकांनी दिली आहे.
तसेच, विशेषतः महिला प्रवाशांनी बसप्रवासादरम्यान आणि बसस्थानकांवर आपल्या बॅगा व दागिन्यांची अधिक काळजी घ्यावी, असे आवाहनही पोलिस अधीक्षकांनी केले आहे.

 #thievesarrested
#athanikagwadinfo