रिल्स बनविणाऱ्या अतिउत्साही तरुणांनो सावधान ... बेळगाव जिल्हा अधीक्षकांनी दिलाय इशारा ...!

बेळगाव : रिल्स बनविणाऱ्या अतिउत्साही तरुणांनो सावधान ...! रिल्स बनविताना मर्यादांचे उल्लंघन करू नका. नाहीतर कायद्याच्या कचाट्यात अडकाल. बेळगाव जिल्हापोलीस प्रमुखांनीही तसा सल्ला वजा ईशारा दिलाय.

अलीकडे 'बिग बॉस' स्पर्धक विनय आणि रजत यांनी तलवार (लांग) हातात घेऊन रील्स बनविल्या. यामुळे पोलिसांनी त्यांना अटक केली. नंतर त्यांना जामिनावर स्वतःची सुटका करून घ्यावी लागली.

अजमेरमध्येही एका तरुणीने हातात बनावट पिस्तुल घेऊन लेडी डॉन ची भूमिका वटविली. तिने हवेत गोळीबाराचा सिन शूट करून रील पोस्ट केली. हा रील प्रचंड व्हायरल झाला. पण या रील मुळे तिला पोलीस ठाण्याची पायरी चढावी लागली.

बेळगावमध्ये काही तरुणांनी कोयता, तलवार आणि खेळण्यातील पिस्तूल घेऊन रील्स तयार करून स्वतःला कायद्याच्या कचाट्यात घातलं आहे.
कोयता, तलवार आणि पिस्तूल घेऊन रील्स तयार केलेल्या या तरुणांच्या रील्स सध्या सोशल मीडियावर प्रचंड व्हायरल होत आहेत. या प्रकारावर प्रतिक्रिया देताना जिल्हा पोलीस प्रमुख भीमाशंकर गुळेद यांनी सांगितले की, काही तरुणांनी हातात कोयता आणि वरून खेळण्याच्या पिस्तूलसारखी वस्तू घेऊन व्हिडिओ शूट केला आहे. यापूर्वी अनेक वेळा अशा शस्त्रांच्या प्रदर्शनासंदर्भात सूचना दिल्या आहेत आणि जनजागृतीदेखील करण्यात आली आहे. असे असूनही शस्त्र घेऊन रील्स करणं समोर आल्यामुळे संबंधित तरुणांची ओळख पटवून त्यांच्यावर कायदेशीर कारवाई करण्याचे आदेश देण्यात आले आहेत.

समाजमाध्यमांवर अशा प्रकारचे व्हिडिओ शेअर करणे कायद्याप्रमाणे गुन्हा असून, अशा 'रील्स'च्या नादात शस्त्र उचलून शिक्षेस पात्र होऊ नका, असा इशारा पोलीस अधीक्षक गुळेद यांनी दिला आहे.
यामुळे तरुणांनो रिल्स बनवताय ....तर सावधान ...स्वतःला अडचणीत आणणाऱ्या रिल्स ......नको रे बाबा ...!!