आणि त्यांनी स्वतःवर झाडून घेतली गोळी ...!

बेळगाव : रुग्णांना जीवदान देणाऱ्या डॉक्टरने स्वतःवर गोळी झाडून घेऊन जीव दिला. ही हृदयद्रावक घटना आज सकाळी गोडसेवाडी-मंडोळी रोड (बेळगाव) परिसरात घडली.
डॉ. दिनेश लक्ष्मण भटकळ असे स्वतःवर गोळी झाडून घेऊन आत्महत्या केलेल्या डॉक्टरांचे नाव असून कर्करोगाने त्रस्त झाल्याने त्यांनी हे  टोकाचे पाऊल उचलल्याचे सांगण्यात येते.

79 वर्षीय डॉ. दिनेश लक्ष्मण भटकळ हे  मूळचे उत्तर कन्नड जिल्ह्यातील अंकोला तालुक्यातील रहिवासी असून, अनेक वर्षे वैद्यकीय सेवा बजावल्यानंतर ते बेळगावमधील गोडसेवाडी-मंडोळी रोड येथे स्थायिक झाले होते. 

काही काळापासून ते गंभीर अशा कर्करोगाने त्रस्त होते.  यामुळे ते नैराश्याने ग्रासले होते. आज शुक्रवारी सकाळी त्यांनी आपल्या राहत्या बंगल्याच्या बाल्कनीत स्वतःवर गोळी झाडून घेतली. गोळीबाराचा आवाज ऐकून कुटुंबीय आणि परिसरातील नागरिक घटनास्थळी धावून आले. मात्र तोपर्यंत त्यांचा मृत्यू झाला होता.

डॉ. दिनेश भटकळ यांनी कर्करोगाने त्रस्त झाल्याने इतका टोकाचा निर्णय घेतला असे सांगण्यात येत असले तरी आत्महत्येमागील नेमके कारण पोलीस तपासानंतर स्पष्ट होणार आहे.