' शिवम असोसिएट्स ' नंतर ' आदित्यराज कॅपिटल ' आले रडारवर ....!

बेळगाव : आदित्यराज कॅपिटल प्रायव्हेट लिमिटेड या आर्थिक संस्थेची बेळगाव उपविभागीय कार्यालयाच्या अधिकाऱ्यांकडून झाडाझडती घेण्यात येत आहे.

ठेवीदारांची फसवणूक केल्याचा आरोप संस्थेवर असून त्याच अनुषंगाने आदित्यराज कॅपिटल प्रायव्हेट लिमिटेड संस्थेच्या उलढालीची चाचपणी केली जात असल्याचे समजते.

बेळगावचे उपविभागीय अधिकारी (एसी) शरवण नायक यांच्या नेतृत्वाखालील पथकाने ' आदित्यराज ' ची तपासणी चालविली आहे.

शहरातील भाग्यनगर परिसरातील या संस्थेने कोणतीही पुरेशी सुरक्षा न देता जादा व्याजदराचे आमिष दाखवून नागरिकांकडून ठेवी गोळा केल्याचा आरोप आहे. तसेच जमा झालेला निधी अन्यत्र गुंतवण्यात आल्याचीही तक्रार करण्यात आली आहे.
या प्रकरणी संस्थेविरोधात केपीआयडी आणि बड्स सेलमध्ये तक्रार दाखल करण्यात आली होती. त्यानुसार उपविभागीय अधिकाऱ्यांच्या नेतृत्वाखालील पथकाने संस्थेच्या कार्यालयाला भेट देऊन विविध कागदपत्रांची तपासणी केली.

 संस्थेच्या आर्थिक व्यवहारांची तसेच ठेवीदारांच्या पैशांच्या वापराची सखोल चौकशी सुरू असून, तपास पूर्ण झाल्यानंतर आणखी माहिती समोर येण्याची शक्यता आहे.