प्लास्टिक कारखान्याला लागली भीषण आग

बेळगाव : प्लास्टिक कारखान्याला लागलेल्या भीषण आगीत लाखो रुपयांच्या प्लास्टिक वस्तू व यंत्रसामग्री जळून खाक झाली. बेळगाव शहरापासून जवळच असलेल्या होनगा औद्योगिक वसाहतीत काल उशिरा रात्री ही घटना घडली.

रात्रीच्या सुमारास होनगा औद्योगिक वसाहतीतील डांगे प्लास्टिक कारखान्यात अचानक आग लागली.

कारखान्यात मोठ्या प्रमाणात प्लास्टिक साहित्य असल्याने काही क्षणांतच आगीने संपूर्ण परिसर व्यापला. घटनेची माहिती मिळताच अग्निशमन दलाचे कर्मचारी तातडीने घटनास्थळी दाखल झाले आणि अथक प्रयत्नांनंतर आग आटोक्यात आणण्यात यश मिळवले. मात्र तोपर्यंत लाखो रुपयांच्या प्लास्टिक वस्तू व यंत्रसामग्री आगीत जळून खाक झाली. आग रात्रीच्या सुमारास लागल्याने कारखान्यात कोणी नव्हते. यामुळे जीवितहानी झाली नाही.

अग्निशमन दलाच्या सतर्कतेमुळे आगीच्या लपेट्यात नजीकचे कारखाने आले नाहीत आणि मोठा अनर्थ टळला. प्राथमिक माहितीनुसार, शॉर्टसर्किटमुळे आग लागल्याची शक्यता व्यक्त करण्यात येत आहे.
काकती पोलिसांनी घटनास्थळी भेट देऊन पाहणी केली. या आग नेमकी कशी लागली आणि आगीत किती किमतीचे नुकसान झाले याचा तपास सुरू आहे.