15 वर्षीय मुलाचा बुडून मृत्यू : मित्रांसोबत पोहण्यासाठी गेला होता नदीवर

बैलहोंगल : मलप्रभा नदीत पोहण्यासाठी गेलेल्या 15 वर्षीय मुलाचा बुडून मृत्यू झाला. महेश मडिवाळप्पा गणाचारी ( रा. वक्कुंद, तालुका : बैलहोंगल ) असे नदी पात्रात बुडून मरण पावलेल्या मुलाचे नाव आहे..

महेश हा शुक्रवारी दुपारी मित्रांसोबत बैलहोंगल तालुक्यातील वक्कुंद गावाजवळील मलप्रभा नदीत पोहण्यासाठी गेला होता. पाण्यात मौजमजा करता करता नदीतील खोल पाण्यात गेल्याने तो बुडाला.

घटनेची माहिती मिळताच समाजसेवक मल्लिकार्जुन गणिगेर तसेच अग्निशमन दलाचे कर्मचारी घटनास्थळी दाखल झाले आणि शोधमोहीम सुरू केली. मात्र अंधार पडल्यामुळे शुक्रवारी रात्री शोधकार्य तात्पुरते स्थगित करण्यात आले.
शनिवारी सकाळी अग्निशमन दलाने पुन्हा शोधमोहीम हाती घेतली. अखेर नदीतून महेशचा मृतदेह बाहेर काढण्यात यश आले.
या दुर्दैवी घटनेमुळे गणाचारी कुटुंबीयांवर दुःखाचा डोंगर कोसळला असून संपूर्ण वक्कुंद गावात शोककळा पसरली आहे. सीपीआय प्रमोद येलिगार व पोलिस कर्मचाऱ्यांनी घटनास्थळी भेट देऊन पाहणी केली.