विद्यार्थ्यांनी वाचन संस्कृतीची जोपासना करावी : शिवाजी हसनेकर

बेळगाव : विद्यार्थ्यांनी वाचन संस्कृतीची जोपासना केली पाहिजेत. वाचनामुळे ज्ञानात भर पडते. ज्ञान हे एका दिवसात मिळत नाही तर त्यासाठी दैनंदिन जीवनात नित्यनेमाने वर्तमानपत्रे, चरित्रे, आत्मचरित्रे, कथा, कादंबरी याचे वाचन केले पाहिजे. यामुळे आपल्याला सामाजिक, आर्थिक, राजकीय घडामोडी समजतात, दृष्टिकोनाचा विस्तार होतो. व्यक्तिमत्त्वाचा विकास होतो, असे प्रतिपादन शिक्षक आणि सामाजिक कार्यकर्ते शिवाजी हसनेकर यांनी केले.

राज्य मराठी विकास संस्था मुंबई आणि छत्रपती शाहू प्रकाशन मंडळाचे साप्ताहिक राष्ट्रवीर बेळगाव यांच्या संयुक्त विद्यमाने मराठी भाषा संवर्धन पंधरवडा निमित्त दक्षिण महाराष्ट्र शिक्षण मंडळ संचलित भगतसिंग हायस्कूल आंबेवाडी येथे निबंध स्पर्धेचे आयोजन करण्यात आले होते.

यावेळी झालेल्या कार्यक्रमात प्रमुख वक्ते म्हणून शिवाजी हसनेकर बोलत होते.
कार्यक्रमाच्या अध्यक्षस्थानी शाळा सुधारणा समितीचे अध्यक्ष शिवाजी अतिवाडकर होते. व्यासपीठावर राष्ट्रवीर साप्ताहिकचे व्यवस्थापक शंकर कंग्राळकर, शाळा सदस्य समितीचे उपाध्यक्ष शिवाजी राक्षे, मल्लाप्पा सांबरेकर, गजानन घुग्रेटकर, मलेश लोहार, लक्ष्मीबाई कोवाडकर, मुख्याध्यापक एन. के. गुरव आदी उपस्थित होते.
कार्यक्रमाची सुरुवात विद्यार्थिनींच्या स्वागत गीताने झाली. स्वागत प्रभारी मुख्याध्यापक एन. के. गुरव यांनी केले. प्रमुख पाहुण्यांची ओळख माधुरी येलूरकर यांनी केले. सूत्रसंचालन जी . जी. पाटील यांनी केले. तर आभार क्रीडा शिक्षक जे. वाय. पाटील यांनी केले. कार्यक्रम यशस्वी करण्यासाठी प्रा. सुरेश पाटील यांनी प्रयत्न केले.
निबंध स्पर्धेत विविध शाळातील 71 विद्यार्थी-विद्यार्थिनींनी भाग घेतला होता.