एसबीएमजे प्राचार्या निशा राजेंद्र यांना पदावर कायम ठेवण्याची पालकांची मागणी

बेळगाव : भुतरामनहट्टी येथील श्री भगवान महावीर जैन इंग्लिश मीडियम रेसिडेन्शियल स्कुल या निवासी शाळेच्या प्राचार्यांना सेवेत कायम ठेवण्याची मागणी शाळेतील विद्यार्थ्यांच्या पालकांनी बेळगाव जिल्हा शिक्षण अधिकाऱ्यांकडे केली आहे.

शाळेच्या प्राचार्या निशा राजेंद्र यांना पदावरून न हटविता त्यांना सेवेत कायम ठेवावे, अशा मागणीचे निवेदन पालकांनी जिल्हा शिक्षणाधिकारी लिलावती हिरेमठ यांना दिले आहे.

अलीकडे काही विद्यार्थ्यांशी संबंधित घडलेल्या एका स्वतंत्र घटनेनंतर प्राचार्यांना बदलण्याची शक्यता असल्याने शाळेतील विद्यार्थ्यांच्या 200 हून अधिक पालकांनी स्वाक्षरी केलेल्या निवेदनाद्वारे प्राचार्या निशा राजेंद्र यांना सेवेतून न हटविण्याची मागणी केली आहे.
त्या अत्यंत शिस्तप्रिय, कर्तव्यदक्ष आणि कठोर प्रशासक असून त्यांची कार्यपद्धती नेहमी विद्यार्थ्यांच्या शैक्षणिक, नैतिक आणि सर्वांगीण विकासासाठी पूरक आहे. निशा राजेंद्र यांनी शाळेत शिस्त, स्थैर्य आणि सातत्यपूर्ण प्रगती निर्माण करण्यात महत्त्वाची भूमिका बजावली आहे. “अनेक पालकांसाठी त्या संस्थेचा चेहरा असून मुलांच्या भविष्याबाबत विश्वास देणाऱ्या व्यक्ती आहेत,” त्यांना पदावरून हटविल्यास शाळेच्या शैक्षणिक वातावरणावर विपरीत परिणाम होऊ शकतो आणि सुमारे 800 विद्यार्थ्यांच्या भविष्यावर त्याचा परिणाम होण्याची शक्यता आहे. यामुळे विद्यार्थ्यांच्या निकालात घसरण होण्यासोबतच पालक आणि शिक्षकांचा विश्वासही डळमळीत होऊ शकतो, असेही पालकांनी निवेदनात म्हटले आहे.
त्यांच्याबाबत“कठोर निर्णय घेण्याऐवजी संबंधित विद्यार्थी आणि पालकांशी चर्चा करून हा प्रश्न सोडवावा,” असा सल्लाही पालकांनी दिला.
दरम्यान, जिल्हा शिक्षणाधिकारी लीलावती हिरेमठ यांनी निवेदन स्वीकारल्यानंतर ते शाळा व्यवस्थापनाकडे पाठवण्याचे आश्वासन पालकांना दिले आहे.