सावध राहा आणि आर्थिक नुकसान टाळा : पोलीस आयुक्तांचे ज्येष्ठांना आवाहन

बेळगाव : सावध राहा आणि आर्थिक नुकसान टाळा असा निर्वाणीचा सल्ला पोलीस आयुक्तांनी ज्येष्ठांना दिला आहे.
बेळगाव जिल्हा ज्येष्ठ नागरिक (जेष्ठ नागरिक) संघ' आणि 'बेळगाव शहर सायबर क्राईम विभाग' यांच्या संयुक्त विद्यमाने श्री सामर्थ्य मंदिर हॉल, टिळकवाडी येथे सायबर क्राईम जनजागृती' सभेचे आयोजन करण्यात आले होते. याप्रसंगी बोलताना पोलीस आयुक्तांनी उपस्थित ज्येष्ठ नागरिकांना हा सल्ला दिला.

ज्येष्ठ नागरिकांनी सावध राहून आपली ऑनलाईन फसवणूक आणि आर्थिक नुकसान टाळावे," असेही बेळगावचे पोलीस आयुक्त भूषण बोरसे म्हणाले.

पॉवर पॉईंट प्रेझेंटेशनच्या माध्यमातून ऑनलाईन फसवणुकीचे विविध प्रकार, जसे की ओटीपी फ्रॉड, 'डिजिटल अरेस्ट'ची भीती, लॉटरी स्कॅम आणि बनावट केवायसी अपडेट्स याबद्दल अत्यंत सोप्या भाषेत माहिती पोलीस आयुक्तांनी संगणकाद्वारे माहिती दिली. त्यांनी सुरक्षिततेचे नियम सांगताना संशयास्पद लिंकवर क्लिक न करण्याचे आवाहन केले. तसेच, पीएसआय सुमन पवार यांनीही तांत्रिक सुरक्षिततेबाबत 'की-नोट' ॲड्रेस सादर करून ज्येष्ठांना मार्गदर्शन केले.

कार्यक्रमाची सुरुवात मानद सचिव सुरेंद्र देसाई यांच्या स्वागतपर भाषणाने झाली, तर एसीपी (सायबर क्राईम) मंतूर यांनी प्रास्ताविक केले. संघाचे अध्यक्ष विश्वास धुराजी यांनी पोलीस आयुक्त भूषण बोरसे आणि इतर पोलीस अधिकाऱ्यांचे पुष्पगुच्छ व शाल देऊन स्वागत केले. यावेळी संदीप देसाई यांनी पोलीस आयुक्तांचा विशेष सन्मान केला. एसीपी (सायबर क्राईम) श्री. मंतूर, सायबर क्राईम पोलीस निरीक्षक श्रीशैल गाबी आणि टिळकवाडी पोलीस निरीक्षक परशुराम पुजारी याप्रसंगी उपस्थित होते.
या संपूर्ण कार्यक्रमाचे नियोजन विकास कलघटगी यांनी केले. संघाचे अध्यक्ष विश्वास धुराजी यांनी अधिकाऱ्यांचे स्वागत केले. पोलीस आयुक्तांनी ज्येष्ठांच्या शंकांचे पूर्णपणे निरसन केले. मानद सह-सचिव शिवराज पाटील यांनी सूत्रसंचालन करून उपस्थितांचे आभार मानले.