जागतिक दर्जाचा 5  कोटींचा जलतरण तलाव दुरवस्थेत ...!

बेळगाव : हनुमान नगर येथील बॉक्साइट रोडलगतच्या उद्यानात उभारण्यात आलेला आंतरराष्ट्रीय दर्जाचा जलतरण तलाव सध्या दुरवस्थेला सामोरा जात असून नागरिकांमध्ये तीव्र नाराजी व्यक्त होत आहे.

महानगरपालिकेने 2019 साली सुमारे 5 कोटी रुपये खर्चून ऑलिम्पिक स्पर्धांमध्ये वापरल्या जाणाऱ्या आंतरराष्ट्रीय मापदंडांनुसार हा जलतरण तलाव उभारला होता. मात्र, बांधकाम पूर्ण झाल्यानंतर त्याच्या देखभाल आणि वापराकडे संबंधित प्रशासनाने दुर्लक्ष केल्याचा आरोप होत आहे.
सध्या हा जलतरण तलाव एखाद्या बेवारस तलावासारखा दिसत आहे. योग्य देखभालीअभावी तलावात पावसाचे पाणी साचले असून डासांची पैदास वाढली आहे. गेल्या काही वर्षांपासून तलावाची अवस्था अत्यंत खराब झाली असून परिसरात झुडपे आणि गवत वाढले आहे. त्यामुळे येथे गैरप्रकार घडण्याचाही धोका निर्माण झाला आहे.
आंतरराष्ट्रीय दर्जाच्या क्रीडा स्पर्धांसाठी आवश्यक असलेल्या सर्व सुविधांसह हा प्रकल्प उभारण्यात आला होता. 50x100 मीटर मोजमापाचा जलतरण तलाव, महिला व पुरुषांसाठी स्वतंत्र चेंजिंग रूम, भूमिगत पाणीसाठा (यूजी टँक), पंपिंग हाऊस आणि फिल्टर युनिट यांचा समावेश आहे. मात्र, या सर्व सुविधा आज मोडकळीस आल्याचे चित्र दिसत आहे.
कोट्यवधी रुपये खर्च करून उभारलेल्या या प्रकल्पाचा नागरिकांना कोणताही लाभ होत नसल्याने स्थानिकांनी संताप व्यक्त केला आहे. तसेच लोकप्रतिनिधी आणि महानगरपालिका अधिकाऱ्यांनी या प्रश्नाकडे गांभीर्याने लक्ष देऊन जलतरण तलाव पुन्हा सुरू करण्याची मागणी नागरिकांकडून होत आहे.