मुलाने वृद्ध आईला सोडले निर्जनस्थळी ?

रायबाग तालुक्यात सत्यव्वा नावाच्या 78 वर्षीय वृद्ध आईला  पैशांसाठी मुलाने घराबाहेर हाकलून दिल्याची घटना ताजी असतानाच सौंदत्ती तालुक्यात एका मुलाने आपल्या वृद्ध आईला रात्री उशिरा निर्जन भागात सोडून दिल्याची हृदयद्रावक घटना समोर आली आहे. 

 
मिळालेल्या माहितीनुसार, रामदुर्ग तालुक्यातील सालहळ्ळी गावातील रहिवासी कमलम्मा नामक वृद्धा सौंदत्ती तालुक्यातील मुनवळळी गावाच्या बाहेरील भागात असहाय अवस्थेत आढळून आली. त्यांना त्यांच्या मुलाने सोमवारी रात्री सुमारे 10 वाजण्याच्या सुमारास तेथे आणून सोडल्याचा आरोप आहे.
कमलम्मा यांचा मुलगा परिवहन खात्यात कर्मचारी म्हणून सेवा बजावतो असे समजते. 
 आपल्या वृद्ध आईला डोंगराळ आणि निर्जन भागात सोडून मानवतेलाच काळिमा फासणाऱ्या या प्रकाराबद्दल संताप व्यक्त होत असला तरी नेमके सत्य काय ? याची सविस्तर माहिती उपलब्ध होऊ शकली नाही.  मुनवळळी पोलीस या प्रकरणाची सत्यासत्यता तपासत असल्याचे समजते.