ईडी घेत आहे दुसऱ्या दिवशीही झाडाझडती : पहाटे मारला निवासस्थानी छापा

बेळगाव : राज्याचे सार्वजनिक बांधकाम खात्याचे मंत्री सतीश जारकीहोळी यांचे भावोजी आणि बेळगावचे अतिरिक्त उत्पादन शुल्क आयुक्त वाय. मंजुनाथ यांच्या निवासस्थानी अंमलबजावणी संचालनालयाने (ईडी) गुरुवारी पहाटे छापा टाकला. सकाळी सुमारे 5.30 वाजता सुरू झालेली ही कारवाई सलग दुसऱ्या दिवशीही सुरू होती.

ईडीचे अधिकारी मंजुनाथ यांच्या घरात ठाण मांडून तपास करत असून त्यांनी अद्याप घराबाहेर पाऊल ठेवलेले नाही. अधिकाऱ्यांसाठी नाश्ता व जेवण घरातच मागविण्यात आले. मंजुनाथ यांची पत्नी आणि कुटुंबीयांचीही चौकशी करण्यात येत असल्याची माहिती मिळाली आहे.
राज्यातील एकूण 10 ठिकाणी ईडीने छापे टाकले असून त्यापैकी सहा ठिकाणे बेळगाव जिल्ह्यात आहेत. या कारवाईदरम्यान बेनामी बार परवाने, करारपत्रे, बेकायदेशीर मालमत्तेशी संबंधित कागदपत्रे तसेच सोने-चांदी जप्त करण्यात आल्याची माहिती समोर आली आहे.
या प्रकरणी ईडीकडून अधिकृत माहिती अद्याप जाहीर करण्यात आलेली नसून तपास सुरू आहे.