शिवराज्याभिषेक सोहळा : ज्ञानमंदिर बनले होते शिवमय

बेळगाव : ज्ञानमंदिर इंग्लिश मीडियम हायस्कूलमध्ये 'शिवराज्याभिषेक सोहळा' अत्यंत उत्साहात आणि देशभक्तीपूर्ण वातावरणात साजरा करण्यात आला. या सोहळ्यानिमित्त ज्ञानमंदिर शिवमय बनले होते. 

इयत्ता आठवी आणि नववीच्या विद्यार्थ्यांनी शिस्त, धैर्य आणि युद्धकलेचे कौशल्य दर्शवणारे प्रभावी 'लाठी-काठी' प्रदर्शन सादर केले. इयत्ता नववीच्या विद्यार्थ्यांनी छत्रपती शिवाजी महाराज यांचे शौर्य आणि पराक्रम अधोरेखित करणारे प्रेरणादायी 'पोवाडे' सादर केले. इयत्ता आठवी आणि नववीच्या विद्यार्थिनींनी "शिवाजी महाराज पाळणा" या गीतावर सुंदर पारंपारिक नृत्य सादर केले, तर विद्यार्थ्यांनी 'शिवगर्जना' करून वातावरण दुमदुमून सोडले आणि महान मराठा राजाबद्दलचा आपला अभिमान व आदर व्यक्त केला.

 प्रारंभी हायस्कूलचे मुख्य कार्यकारी अधिकारी (CEO) स्वप्नील वाके आणि मुख्याध्यापिका श्रीमती प्रेमलता पाटील यांनी  दीपप्रज्वलित केला.  त्यानंतर मुख्याध्यापिका आणि शिक्षकवृंदाने छत्रपती शिवाजी महाराज यांच्या मूर्तीवर विधिवत अभिषेक केला. मान्यवर, शिक्षक आणि विद्यार्थ्यांनी एकत्रितपणे महाराजांची आरती केली.

उपस्थितांना मार्गदर्शन करताना CEO श्री. स्वप्नील यांनी छत्रपती शिवाजी महाराज यांच्या आदर्शांवर प्रकाश टाकला आणि विद्यार्थ्यांना धैर्य, नेतृत्व, शिस्त व देशभक्ती यांसारखी मूल्ये आपल्या जीवनात अंगीकारण्यासाठी प्रोत्साहित केले.

प्रभा रायकर यांनी आभार प्रदर्शनाद्वारे कार्यक्रमाची सांगता केली. कार्यक्रमाचे सूत्रसंचालन कु. सायली आस्तेकर यांनी प्रभावीपणे केले. शिक्षक आणि शिक्षकेतर कर्मचाऱ्यांच्या पूर्ण सहकार्याने  प्रतीक आपटेकर आणि  कृष्णा अनसुरकर यांनी या संपूर्ण कार्यक्रमाचे संयोजन केले.