संस्कार भारतीचा भक्तिरसपूर्ण कार्यक्रम : कलाकारांनी श्रोत्यांना केले मंत्रमुग्ध

बेळगाव : पुरुषोत्तम मासाचे औचित्य साधून संस्कार भारती, बेळगाव शाखेच्या वतीने राणी चन्नम्मानगर येथील निवेदार्पण अकॅडेमी ऑफ म्युझिकच्या सभागृहात विशेष सांस्कृतिक व भक्तिमय कार्यक्रमाचे आयोजन करण्यात आले होते.

कार्यक्रमाची सुरुवात मान्यवरांच्या हस्ते दीपप्रज्वलनाने झाली. चंद्रशेखर नवलगुंद यांनी उपस्थितांचे स्वागत करत कार्यक्रमाचे सूत्रसंचालन केले. त्यानंतर राजश्री गुमास्ते यांनी संस्कार भारतीचे ध्येयगीत सादर करून वातावरण भक्तिमय केले.
हुबळीहून आलेले संस्कार भारतीचे कार्यकर्ते श्रीनिवास यांनी अधिक मासाचे धार्मिक महत्त्व, संस्कार भारतीचे विविध उपक्रम आणि संस्थेच्या कार्याची माहिती देत उपस्थितांना सहकार्याचे आवाहन केले.
यानंतर राग-रागिणी गानवृंदच्या कलाकारांनी सादर केलेल्या भजन संध्येला रसिकांची उत्स्फूर्त दाद मिळाली. मराठी व कन्नड भाषेतील 17 हून अधिक भक्तिगीते सादर करत कलाकारांनी तब्बल दीड तास श्रोत्यांना मंत्रमुग्ध केले.
या भजन संध्येत डॉ. गुरुराज मनगुळी, माल्तेश पदकी, अमोल कुलकर्णी, अशोक कट्टी (संवादिनी), विनय पावसकर (तबला), सुनंदा मनगुळी, दीपा पदकी, पूजा कुलकर्णी, वसुंधरा कुलकर्णी, मेधा कुलकर्णी आणि स्नेहा देशपांडे यांनी सहभाग घेतला.
कार्यक्रमाच्या यशस्वी आयोजनासाठी संस्कार भारतीचे वैभव देशपांडे, गोविंद केळकर, किशोर काकडे, कुलकर्णी यांच्यासह अन्य कार्यकर्त्यांनी विशेष परिश्रम घेतले. संस्थेच्या अध्यक्षा डॉ. नीता देशपांडे यांनी उपस्थितांना मार्गदर्शन केले.