मंत्री सतीश जारकीहोळी यांच्या हस्ते खरीप पीकविमा योजनेच्या माहितीपत्रकाचे प्रकाशन

बेळगाव : जिल्हाधिकारी कार्यालयातील सभागृहात शनिवारी आयोजित जिल्हा आपत्ती व्यवस्थापन आढावा बैठकीनंतर जिल्हा प्रशासन, जिल्हा परिषद आणि कृषी विभाग यांच्या संयुक्त विद्यमाने 2026 च्या खरीप हंगामासाठीच्या कर्नाटक शेतकरी सुरक्षा प्रधानमंत्री पीकविमा योजना संदर्भातील माहितीपत्रकाचे प्रकाशन सार्वजनिक बांधकाम मंत्री सतीश जारकीहोळी यांच्या हस्ते करण्यात आले.

प्रधानमंत्री पीकविमा योजनेबाबत शेतकऱ्यांमध्ये जनजागृती निर्माण करण्याच्या उद्देशाने हे माहितीपत्रक तयार करण्यात आले आहे. यामध्ये योजनेअंतर्गत मिळणाऱ्या सुविधा, नोंदणी प्रक्रिया, विमा हप्ता, पीक नुकसानीची भरपाई तसेच इतर महत्त्वाची माहिती समाविष्ट करण्यात आली आहे.
यावेळी मंत्री सतीश जारकीहोळी यांनी शेतकऱ्यांनी या योजनेचा लाभ घ्यावा व आपल्या पिकांचा विमा उतरवून नैसर्गिक आपत्तीमुळे होणाऱ्या आर्थिक नुकसानीपासून संरक्षण मिळवावे, असे आवाहन केले.
या प्रसंगी विधान परिषद सदस्य चन्नराज हट्टीहोळी, बुडा अध्यक्ष लक्ष्मणराव चिंगळे, पोलीस आयुक्त भोरसे गुलाबराव भूषण, जिल्हा पोलीस अधीक्षक के. रामराजन, जिल्हा परिषद मुख्य कार्यकारी अधिकारी राहुल शिंदे यांच्यासह विविध विभागांचे अधिकारी उपस्थित होते.