राजू कागे यांची मंत्रिपदावर नजर ....!

कागवाड: राज्यातील काँग्रेस सरकारच्या मंत्रिमंडळात फेरबदलाच्या चर्चांना उधाण आले असताना उत्तर कर्नाटकातील ज्येष्ठ काँग्रेस नेते व कागवाड मतदारसंघाचे आमदार राजू कागे यांनी मंत्रिपदाची इच्छा व्यक्त केली आहे.

 "मंत्रीपद मागून मिळवण्यात अर्थ नाही. पक्षाने संधी दिल्यास मी मंत्रिपदाची जबाबदारी सक्षमपणे पार पाडू शकतो. मला मंत्री होण्याची इच्छा आहे, मात्र ती कोणत्याही प्रकारची लालसा नाही, असे "उगार येथे प्रसारमाध्यमांशी बोलताना राजू कागे म्हणाले.

काँग्रेस विधिमंडळ पक्षाच्या (CLP) बैठकीस गैरहजर राहिल्याबाबत त्यांनी स्पष्टीकरण देताना म्हटले की, प्रकृती अस्वास्थ्यामुळे मी बैठकीस उपस्थित राहू शकलो नाही. याबाबत  पूर्वसूचना देऊन मी पत्रही दिले होते.
बेंगळूरमध्ये मंत्रिपदासाठी लॉबिंग सुरू असतानाही आपण मतदारसंघात सक्रिय असून जनतेच्या प्रश्नांवर काम करत असल्याचे कागे यांनी म्हटले आहे.
"मंत्रीपद मिळवण्यासाठी कोणाच्याही पाठिंब्याची आवश्यकता नाही. पक्षाने कोणतीही जबाबदारी दिली तरी ती यशस्वीपणे पार पाडण्याचा मला आत्मविश्वास आहे," असेही ते म्हणाले.
उत्तर कर्नाटकातील वरिष्ठ नेतृत्वाला मंत्रिमंडळात प्रतिनिधित्व मिळावे, असे मत व्यक्त करताना त्यांनी या भागाला योग्य संधी मिळण्याची अपेक्षा व्यक्त केली. दरम्यान, काँग्रेसच्या वर्तुळात आगामी मंत्रिमंडळ फेरबदलात राजू कागे यांना संधी मिळणार का, याबाबत चर्चा रंगू लागली आहे.

#rajukage
#kagawad