मतदार यादीच्या विशेष सघन पुनरावलोकनाबाबत जनजागृती रॅली

बेळगाव: जिल्हा स्वीप समितीच्या वतीने मतदार यादीच्या विशेष सघन पुनरावलोकन (SIR) अभियानाबाबत जनजागृती करण्यासाठी सोमवारी शहरात विद्यार्थ्यांची जनजागृती रॅली आयोजित करण्यात आली होती.

जिल्हाधिकारी कार्यालयाच्या आवारात जिल्हा स्वीप समितीचे नोडल अधिकारी रवि बंगारेप्पनवर यांनी रॅलीला हिरवा झेंडा दाखवून शुभारंभ केला.
ही रॅली जिल्हाधिकारी कार्यालय, चन्नम्मा चौक आणि क्लब रोड मार्गे शालेय शिक्षण व साक्षरता विभागाच्या उपसंचालक कार्यालयापर्यंत काढण्यात आली. रॅलीदरम्यान विद्यार्थ्यांनी नागरिकांमध्ये मतदार नोंदणी व मतदार यादी पुनरावलोकनाबाबत जागृती केली.
या रॅलीत शालेय शिक्षण व साक्षरता विभाग, बेळगाव विभागाच्या उपसंचालिका श्रीमती लीलावती हिरेमठ, जिल्हा पीयू महाविद्यालयाचे नोडल अधिकारी एम. ए. मुल्ला, जिल्हा शालेय शिक्षण प्रशिक्षण केंद्राचे व्याख्याते एम. एम. मदनबावी, व्याख्यात्या एम. एल. कोरबू यांच्यासह सरदार्स पदवीपुर्व कॉलेज, बेनन स्मिथ शिक्षण प्रशिक्षण केंद्र, संगोळी रायण्णा बी.एड. कॉलेज आणि मन्नूर बी.एड. प्रशिक्षण केंद्रातील शेकडो विद्यार्थ्यांनी सहभाग घेतला होता.