' बाँड 'वरील घरांना वीजजोडणी द्या; जिल्हाधिकाऱ्यांकडे मागणी 

बेळगाव : बेळगावातील विविध कॉलनींमध्ये बाँड वर खरेदी केलेल्या जमिनीवर  घरे बांधून राहणाऱ्या गरीब कुटुंबांना तातडीने वीज मीटर उपलब्ध करून द्यावेत, अशी मागणी करत आज जिल्हाधिकाऱ्यांमार्फत शासनाला निवेदन धाडण्यात आले.
बाँड वर खरेदी केलेल्या जमिनीवर  घरे बांधून  वीज नसल्याने अंधारात हालअपेष्टा सहन करणाऱ्या शेकडो नागरिकांनी जिल्हाधिकारी कार्यालयासमोर जमून संताप व्यक्त केला.
बाँडवर खरेदी केलेल्या जमिनीवर घरे बांधलेल्या नागरिकांना वीजजोडणी द्यावी, या मागणीसाठी आज बेळगाव जिल्हाधिकाऱ्यांमार्फत सरकारला निवेदन देण्यात आले.

बेळगावातील अमन नगर, उज्वल नगर, समर्थ नगर आणि वैभव नगर येथील झटपट कॉलनीसह अनेक कॉलनीमध्ये अनेक गरीब कुटुंबे  बाँडवरील जमिनीवर घरे बांधून वास्तव्य करीत आहेत.  मात्र, त्यांना वीज मीटर न दिल्याने  मोठ्या अडचणींचा सामना करावा लागत आहे. 
मागील हिवाळी अधिवेशनावेळी मंत्र्यांना आणि आमदारांना निवेदन देऊनही कोणतीही कार्यवाही झालेली नाही. बाँडधारक आणि बी-खाता धारकांकडे दुर्लक्ष केले जात असल्याचा आरोप यावेळी करण्यात आला.
बेंगळूरसाठी एक धोरण आणि बेळगावासाठी दुसरे धोरण अवलंबले जात आहे. जिल्हाधिकाऱ्यांनी गरीब नागरिकांना तातडीने वीज मीटर उपलब्ध करून द्यावेत. येत्या पावसाळी अधिवेशनात सरकारने याबाबत घोषणा करावी,” अशी मागणी अंजुमन संस्थेचे उत्तर कर्नाटक प्रमुख जावीद नेगिनहाळ यांनी केली.
गरीब नागरिकांनी बाँडच्या आधारे जागा खरेदी करून घरे बांधली आहेत. मात्र, अनेक घरांना वीजजोडणी नसल्याने नागरिकांना दिवे लावून जुन्या पद्धतीने जीवन जगावे लागत आहे. तसेच व्यवसाय आणि दैनंदिन कामकाजावरही परिणाम होत असल्याचे त्यांनी सांगितले. त्यामुळे या घरांना तातडीने वीजजोडणी द्यावी, अशी मागणी करण्यात आली.

“ गेल्या एका वर्षापासून आम्ही ही समस्या सहन करत आहोत. बेळगावच्या हिवाळी अधिवेशनात आंदोलन करून निवेदन दिले, तरी सरकारने याकडे लक्ष दिले नाही. येत्या पावसाळी अधिवेशनात मुख्यमंत्र्यांनी यावर ठोस निर्णय घ्यावा, ” अशी मागणी अंजुमन उत्तर कर्नाटकचे कार्यकारी सचिव अब्दुल वाहीद अत्तार यांनी केली.