नारी शक्ती आक्रमक : केली सी. टी. रवींच्या राजीनाम्याची मागणी : छेडले चन्नम्मा चौकात आंदोलन

बेळगाव : राज्याच्या महिला व बालकल्याण खात्याच्या मंत्री लक्ष्मी हेब्बाळकर यांच्याबद्दल वापरलेले अश्लील शब्द विधान परिषद आमदार सी. टी. रवी यांना चांगलेच भोवले आहेत.
आमदार पदावरून त्यांची हकालपट्टी होईतोपर्यंत काँग्रेस कार्यकर्ते स्वस्थ बसणार नाहीत असा इशारा काँग्रेस कार्यकर्त्यांनी दिला आहे. या मागणीसाठी नारी शक्तीही आज आक्रमक झाली.

सी. टी. रवी यांच्याविरोधात लक्ष्मी हेब्बाळकर समर्थक उग्र झाले असून राज्यपालांनी रवी यांचा राजीनामा घेईतोपर्यंत विविधमार्गे आंदोलन सुरू ठेवले जाईल, असा इशारा कार्यकर्त्यांनी दिला आहे.

आज बेळगाव ग्रामीण मतदार संघातील हेब्बाळकर यांच्या समर्थकांनी राणी चन्नम्मा सर्कल येथे उग्र आंदोलन छेडले. यानंतर सी. टी. रवी यांच्या प्रतिकात्मक प्रतिकृतीची तिरडीवरून अंत्ययात्रा काढण्यात आली. चिडलेल्या महिलावर्गांने आमदार रवी यांच्या छायाचित्राला चपलेने मारून आपला संताप व्यक्त केला. भर चौकात त्यांच्या प्रतिकृतीचे दहन करून रवी यांच्याविरोधात घोषणाबाजी करण्यात आली. आमदार व राज्याच्या मंत्री हेब्बाळकर यांच्याबद्दल अश्लील शब्द उच्चारून आमदार सी. टी. रवी यांनी संपूर्ण महिलावर्गाचा अपमान केला आहे. त्यांना प्रायश्चित दिले जावे, अशी मागणी यावेळी महिलांनी केली.

सी. टी. रवी यांची आमदार पदावरून त्यांची हकालपट्टी करावी, राज्यपालांनी त्यांचा राजीनामा घ्यावा, अशी मागणी यावेळी करण्यात आली. आंदोलकांनी जिल्हाधिकारी कार्यालयावर मोर्चाने जाऊन सदर मागणीचे निवेदन सादर केले.
बहुसंख्येने जमलेल्या या समर्थकांनी हातात निषेधाचे फलक आणि बॅनर घेऊन आमदार रवी यांच्या विरोधात जोरदार निदर्शने करत त्यांचा धिक्कार केला.
आंदोलनामध्ये महिला समर्थक मोठ्या संख्येने सहभागी झाल्या होत्या.