एमएलआयआरसीच्या “योग फॉर हेल्दी एजिंग” ला मिळाला उत्स्फूर्त प्रतिसाद

बेळगाव : आंतरराष्ट्रीय योग दिनाच्या पार्श्वभूमीवर मराठा लाईट इन्फंट्री रेजिमेंटल सेंटर (एमएलआयआरसी), बेळगाव यांच्या पुढाकाराने शिवतीर्थ येथील मिलिटरी महादेव मंदिर परिसरात विशेष सामुदायिक योग कार्यक्रम आयोजित करण्यात आला होता. “योग फॉर हेल्दी एजिंग” या संकल्पनेवर आधारित उपक्रमात विविध वयोगटांतील नागरिकांनी मोठ्या संख्येने सहभाग घेतला होता.

विद्यार्थी, शिक्षक, ज्येष्ठ नागरिक तसेच एमएलआयआरसीचे जवान अशा विविध घटकांचा या कार्यक्रमात सहभाग होता. योगाविषयी वाढती जनजागृती आणि आरोग्याबाबतची जागरूकता याचे दर्शन या निमित्ताने येथे घडले.
प्रशिक्षित योग मार्गदर्शकांनी उपस्थितांना विविध योगासने, प्राणायाम आणि त्यांचे आरोग्यदायी फायदे समजावून सांगितले तसेच नियमित योगाभ्यासामुळे शारीरिक तंदुरुस्तीबरोबरच मानसिक स्वास्थ्य आणि तणावमुक्त जीवन साध्य होऊ शकते असे त्यांनी स्पष्ट केले.
या उपक्रमामुळे सैन्यदलातील जवान आणि सर्वसामान्य नागरिक एकाच मंचावर आले. परिणामी सामाजिक सलोखा, परस्पर सहकार्य आणि सामूहिक आरोग्याबाबतची भावना अधिक बळकट झाली.
आरोग्य, तंदुरुस्ती आणि सामाजिक एकात्मता जपण्याच्या आपल्या वचनबद्धतेचा पुनरुच्चार एमएलआयआरसीने या कार्यक्रमातून करून दिला. तसेच नागरिक आणि सैन्यदल यांच्यातील संबंध अधिक दृढ करण्यासाठी अशा उपक्रमांचे महत्त्व दाखवून दिले.