आमदार विश्वास वैद्य म्हणतात, ' नेतृत्व बदलाबद्दल आपल्याला काहीच माहिती नाही '

बेळगाव : नेतृत्व बदलाबद्दल आपल्याला काहीच माहिती नसल्याचे आमदार विश्वास वैद्य यांनी म्हटले आहे. 

राज्यात नेतृत्व बदलाचे वारे जोराने वाहत असून मुख्यमंत्री बदलाबद्दल राजकीय वर्तुळात चवीने चर्चा सुरू आहे. मात्र,  मुख्यमंत्री सिद्धरामय्या यांच्या नाश्ता बैठकीबाबत किंवा बदलाबाबत आपल्याला कोणतीही माहिती नसल्याचे आमदार यांनी स्पष्ट केले आहे. 
यल्लम्मा प्राधिकरणाच्या बैठकीनिमित्त आपण सध्या बेळगावात असल्याने नेतृत्व बदलाबद्दल आपल्याला काही माहित नाही, असे त्यांनी सांगितले.
माध्यमांशी बोलताना विश्वास वैद्य म्हणाले की, “सीएलपी बैठकीबाबत अद्याप कोणतीही अधिकृत माहिती आलेली नाही. सतीश जारकीहोळी यांना केपीसीसी अध्यक्षपद दिल्यास ते उत्तम काम करतील आणि पक्षाला पुन्हा सत्तेत आणण्यासाठी मदत करतील. उद्या पक्षाकडून संदेश आला तर मी बैठकीला जाईन.”
तसेच, “मला मंत्रिपदाची कोणतीही अपेक्षा नाही. चार-पाच महिन्यांपूर्वी बेंगळूरमध्ये दोन वेळा निवडून आलेल्या आमदारांसह तब्बल 65 आमदारांची बैठक झाली होती. 136 आमदारांपैकी सुमारे 40 टक्के आमदार प्रथमच निवडून आले आहेत. आम्हालाही संधी द्यावी, अशी मागणी आम्ही केली होती,” असे त्यांनी सांगितले.
मुख्यमंत्रीपद तसेच केपीसीसी अध्यक्षपदाबाबत अंतिम निर्णय हा पक्षाच्या हायकमांडकडे असल्याचेही विश्वास वैद्य यांनी नमूद केले.