लक्ष्मी हेब्बाळकर यांनी दिली विविध विकास कामांना चालना

बेळगाव : बेळगाव ग्रामीण मतदान संघाच्या आमदार आणि माजी मंत्री लक्ष्मी हेब्बाळकर यांनी आज मतदार संघातील विविध विकास कामांना चालना दिली. 
बेळगाव ग्रामीण मतदारसंघातील पायाभूत सुविधांच्या विकासाला अधिक गती देण्याच्या उद्देशाने ग्रामीणच्या आमदार लक्ष्मी हेब्बाळकर यांनी विविध गावांमध्ये रस्ते, गटारी, पूल तसेच धार्मिक इमारतींच्या बांधकामासह अनेक विकासकामांचे भूमिपूजन करून विकासकामांचा  शुभारंभ केला. याचबरोबर मंदिर बांधकामासाठी आर्थिक सहाय्याचा धनादेशही सुपूर्द केला.

त्यांनी सुमारे 1.12 कोटी रुपयांच्या खर्चातून निर्माण करण्यात येणाऱ्या बडस गाव ते बिदरगड्डी दरम्यानच्या रस्त्याच्या कामाचे भूमिपूजन ग्रामस्थांच्या उपस्थितीत केले. 
तसेच  बेंडिगेरी गावात सुमारे 1.05 कोटी रुपयांच्या खर्चातून निर्माण करण्यात येणाऱ्या  रस्ता आणि गटार बांधकामाचे भूमिपूजन त्यांनी केले. सदर कामे दर्जेदार पद्धतीने आणि निर्धारित कालावधीत पूर्ण करण्याच्या सूचना त्यांनी कंत्राटदारांना दिल्या.

यानंतर  अरळीकट्टी गावात सुमारे 1 कोटी रुपयांच्या खर्चातून नव्याने उभारण्यात येणाऱ्या श्री बसवेश्वर मंदिराच्या इमारत बांधकामासाठी तिसऱ्या हप्त्याचे 20 लाख रुपयांचा धनादेश लक्ष्मी हेब्बाळकर यांनी, तोंटदार्य विरक्त मठाचे पूज्य शिवामूर्ती अज्जनवरू यांच्या उपस्थितीत सुपूर्द केला.
या कार्यक्रमात बोलताना तोंटदार्य विरक्त मठाचे पूज्य शिवामूर्ती अज्जनवरू यांनी,  हे मंदिर गावकऱ्यांच्या श्रद्धेचे केंद्र बनण्याबरोबरच सामाजिक आणि सांस्कृतिक उपक्रमांसाठीही महत्त्वाचे व्यासपीठ ठरेल, असे म्हटले.
यानंतर बेळगाव ग्रामीण मतदारसंघातील बसरीकट्टी, माविनकट्टी आणि होन्निहाळ या गावांना जोडणाऱ्या ब्रिज (बॉक्स कल्व्हर्ट) बांधकामाचे भूमिपूजन करून त्यांनी कामाला सुरुवात केली.
सुमारे 50 लाख रुपयांच्या खर्चातून हे काम हाती घेण्यात आले असून, पावसाळ्यातही गावांमधील संपर्क सुरळीत राहावा या उद्देशाने हा प्रकल्प राबविण्यात येत आहे. हे काम निश्चित मुदतीत पूर्ण करून नागरिकांच्या सेवेत उपलब्ध करून देण्याच्या सूचना त्यांनी कंत्राटदारांना दिल्या.