बेळगावात आधार सेवा केंद्राचे उद्घाटन : जिल्हाधिकाऱ्यांच्या हस्ते करण्यात आले उदघाटन

बेळगाव : भारतीय विशिष्ट ओळख प्राधिकरणाच्या (UIDAI) वतीने बेळगावात आधार सेवा केंद्र सुरू करण्यात आले असून या आधार सेवा केंद्राचे उद्घाटन जिल्हाधिकारी मोहम्मद रोशन यांच्या हस्ते करण्यात आले. यावेळी भारतीय विशिष्ट ओळख प्राधिकरणाच्या(UIDAI) च्या उपसंचालिका सिरी आनंद व्ही. उपस्थित होत्या.

कार्यक्रमात बोलताना सिरी आनंद व्ही. यांनी,  आधार सेवा केंद्रामध्ये उपलब्ध असलेल्या विविध सेवांची माहिती दिली. तसेच भारतीय विशिष्ट ओळख प्राधिकरणाच्या(UIDAI)  चे व्यवस्थापक मोहम्मद मुसाब यांनी ऑनलाईन अपॉइंटमेंट बुकिंग प्रक्रिया आणि नव्या आधार ॲपची वैशिष्ट्ये याबाबत सादरीकरण केले.
जिल्हाधिकारी मोहम्मद रोशन यांनी भारतीय विशिष्ट ओळख प्राधिकरणाच्या ( UIDAI ) कडून राबविण्यात येत असलेल्या नागरिकाभिमुख सेवा उपक्रमांचे कौतुक केले. सार्वजनिक तक्रारींचे त्वरित निराकरण आणि दर्जेदार सेवा पुरविणे हे सर्वोच्च प्राधान्य असले पाहिजे, असे त्यांनी सांगितले. तसेच आधार सेवा केंद्रामध्ये उपलब्ध सुविधा आणि सेवांबाबत जनजागृती करण्यासाठी माध्यमांनी महत्त्वाची भूमिका बजावावी, असेही त्यांनी नमूद केले.
कार्यक्रमादरम्यान जिल्हाधिकाऱ्यांच्या आधार बायोमेट्रिक माहितीचे प्रत्यक्ष अद्ययावतीकरण करण्यात आले. तसेच आधार नोंदणी आणि अद्ययावत प्रक्रियेचे प्रात्यक्षिकही सादर करण्यात आले.
यावेळी भारतीय विशिष्ट ओळख प्राधिकरणाच्या( UIDAI) च्या उपसंचालिका सिरी आनंद व्ही., व्यवस्थापक मोहम्मद मुसाब, क्लस्टर व्यवस्थापक श्याम सुंदर, BLS इंटरनॅशनल सर्व्हिसेस लिमिटेडच्या आधार सेवा केंद्र व्यवस्थापिका स्वाती कोटबागी, जिल्हा आधार सल्लागार विनोद तसेच इतर अधिकारी व कर्मचारी उपस्थित होते.