अतिक्रमण हटाव मोहिमेला आलाय वेग

बेळगाव :  वाहनचालक, ग्राहक व स्थानिक नागरिकांकडून वारंवार येणाऱ्या तक्रारींच्या पार्श्वभूमीवर महापालिका आणि रहदारी नियंत्रण पोलिसांनी  संयुक्तरित्या गणपती गल्ली तसेच कांदा मार्केट परिसरात अतिक्रमण  हटाव मोहीम हाती घेतली आहे. या मोहिमेमुळे परिसराने मोकळा श्वास घेतला असून स्थानिक नागरिक व वाहनचालकांनी या उपक्रमाचे स्वागत केले आहे. शहरातील इतर गर्दीच्या भागांमध्येही अशाच मोहिमा राबवण्याची मागणी लोकांतून केली जात आहे.

 बेळगाव शहरातील सर्वाधिक वर्दळीच्या गणपती गल्ली बाजारपेठ परिसरातील सततच्या वाहतूक कोंडीच्या समस्येवर उपाय म्हणून शहर पोलिस व महापालिकेने संयुक्तपणे गेल्या काही दिवसांपासून अतिक्रमण हटवण्याची मोहीम हाती घेतली आहे. या मोहिमेत रस्त्यांवर व पदपथांवर उभारण्यात आलेली अनधिकृत वाढीव बांधकामे, फळ विक्रेत्यांच्या हातगाड्या, तात्पुरती दुकाने, फलक व इतर अडथळे हटवण्यात आले.
कारवाईदरम्यान अधिकाऱ्यांनी व्यापाऱ्यांना महापालिकेने आखून दिलेल्या पांढऱ्या सीमारेषेतच व्यवसाय करण्याच्या सूचना दिल्या. काही विक्रेत्यांनी स्वयंस्फूर्तीने आपली तात्पुरती अतिक्रमणे हटवली, तर काहींवर थेट कारवाई करण्यात आली. रस्त्यावर अडथळा निर्माण करणारे अनधिकृत फलक व संरचना जप्त करण्यात आल्या.

ही मोहीम उपजीविकेला धक्का देण्यासाठी नसून वाहतूक सुरळीत ठेवणे व सार्वजनिक सुरक्षितता सुनिश्चित करणे हा मुख्य उद्देश असल्याचे पोलिसांनी स्पष्ट केले. सहाय्यक पोलिस आयुक्त जे. आर. निकम यांनी नियमांचे उल्लंघन करणाऱ्यांवर पुढेही कडक कारवाई केली जाईल, असा इशारा दिला आहे. तसेच पुन्हा अतिक्रमण होऊ नये यासाठी नियमित तपासणी व देखरेख केली जाणार असल्याचे महापालिकेने सांगितले.

#encrochment 
#ganapatgalli 
#citycorporation 
#CityPolice 
#AtikramanHatav