शांतता आणि सौहार्दाने मोहरम साजरा करण्यावर भर

सौन्दत्ती : शहरात येऊ घातलेल्या मोहरम सणाच्या पार्श्वभूमीवर तो शांततापूर्ण आणि सौहार्दपूर्ण वातावरणात साजरा व्हावा, यासाठी स्थानिक पोलीस ठाण्याच्या आवारात पूर्वतयारी शांतता समितीची बैठक आयोजित करण्यात आली होती.

 या बैठकीत हिंदू आणि मुस्लिम समाजातील प्रमुख नेत्यांनी सहभाग घेऊन सामाजिक ऐक्य आणि बंधुभाव जपण्याचा निर्धार व्यक्त केला.
बैठकीत बोलताना पीआय सुरेश बेंडेगुंबळ यांनी सांगितले की, सौंदत्ती शहर अनेक दशकांपासून हिंदू-मुस्लिम ऐक्य आणि बंधुभावासाठी ओळखले जाते. येथील नागरिक सर्व सण एकमेकांविषयी प्रेम आणि विश्वास ठेवून साजरे करतात, ही अभिमानाची बाब आहे. मोहरम सण धार्मिक श्रद्धा आणि परंपरेनुसार शांततेत साजरा करावा, असे आवाहन त्यांनी केले.
सणाच्या आयोजनाबाबत मार्गदर्शन करताना त्यांनी सांगितले की, उच्च न्यायालयाच्या आदेशानुसार मोहरम उत्सवात डीजेच्या वापरास पूर्ण बंदी आहे. सर्वांनी या नियमाचे काटेकोर पालन करावे. डीजेऐवजी करडी माजलू, लेझीम यांसारख्या पारंपरिक कलांना प्राधान्य द्यावे. तसेच समाजातील शांतता आणि सुव्यवस्थेला बाधा पोहोचवणाऱ्या किंवा कोणत्याही प्रकारच्या अनुचित घटनांना प्रोत्साहन देणाऱ्या व्यक्तींबाबत तातडीने पोलिसांना माहिती द्यावी, असेही त्यांनी सांगितले.
मोहरमच्या शेवटच्या दिवशी हिंदू-मुस्लिम बांधवांनी पूर्वीप्रमाणे एकत्र येऊन हा सण अर्थपूर्ण आणि सौहार्दपूर्ण वातावरणात साजरा करण्याचा निर्णयही बैठकीत घेण्यात आला.
यावेळी दिलावर मुल्ला, भरमप्पा अन्नीगेरी, मौलासाब तब्बलजी, रियाज पटाद, अर्जुन अमोजी, महुसेन तहसीलदार, हनमंत पाटील, भीमशी इळगेर, राजू हलकट्टी, राजू बल्लारी, दिलावर बेटगेरी, बसवराज मळमणी, शाहजान संगोळी, फक्कीरप्पा सुतगट्टी यांच्यासह विविध समाजांचे नेते, स्थानिक मान्यवर आणि पोलीस कर्मचारी उपस्थित होते.