मधुमेहाबाबत अनावश्यक भीती बाळगू नका : डॉ. संदीप श्रीवास्तव

बेळगाव : मधुमेह हा इतका घातक आजार नाही. योग्य वेळी डॉक्टरांचा सल्ला घेऊन उपचार केल्यास हा आजार प्रभावीपणे नियंत्रणात ठेवता येतो, असे मत ज्येष्ठ मधुमेह तज्ज्ञ डॉ. संदीप श्रीवास्तव यांनी व्यक्त केले.

शहराबाहेरील एका खासगी हॉटेलमध्ये मेड बेल ग्लोबल हेल्थ केअर अँड रिसर्च फाउंडेशनतर्फे आयोजित दोन दिवसीय मधुमेह जनजागृती कार्यक्रमाच्या उद्घाटनप्रसंगी ते बोलत होते.
यावेळी डॉ. श्रीवास्तव म्हणाले की, मधुमेह रुग्णांनी आजाराबाबत अनावश्यक भीती किंवा चिंता बाळगू नये. आत्मविश्वासाने आणि धैर्याने आरोग्याची काळजी घेतल्यास उत्तम जीवन जगता येते. नियमित व्यायाम, सकस आहार आणि निरोगी जीवनशैलीच्या माध्यमातून मधुमेह नियंत्रणात ठेवणे शक्य आहे. बेळगावमध्ये इतक्या मोठ्या प्रमाणावर मधुमेह जनजागृती कार्यक्रम आयोजित केल्याबद्दल त्यांनी मेड बेल ग्लोबल संस्थेचे कौतुक केले.
तंत्रज्ञानाच्या प्रगतीमुळे आज मधुमेहासह अनेक आजारांवर आधुनिक उपचार उपलब्ध आहेत. त्यामुळे आजाराकडे दुर्लक्ष न करता सुरुवातीच्या टप्प्यातच तपासणी करून घेणे आणि डॉक्टरांच्या सल्ल्याचे पालन करणे आवश्यक असल्याचे त्यांनी सांगितले.
आजच्या धकाधकीच्या जीवनशैलीमुळे, तणावामुळे आणि अनियमित आहार पद्धतीमुळे मधुमेहाचे प्रमाण वाढत आहे. कामासोबतच आरोग्याची काळजी घेणे ही प्रत्येकाची जबाबदारी आहे. निरोगी समाजाच्या निर्मितीसाठी जनजागृती आणि प्रतिबंधात्मक उपाययोजना महत्त्वाच्या आहेत, असेही त्यांनी नमूद केले.
प्रसिद्ध हृदयरोगतज्ज्ञ डॉ. देवी प्रसाद शेट्टी यांनीही यावेळी मार्गदर्शन केले. मधुमेह नियंत्रणात ठेवण्यासाठी जनजागृती, नियमित व्यायाम, संतुलित आहार आणि वैद्यकीय सल्ला अत्यंत आवश्यक असल्याचे त्यांनी सांगितले. आजाराचे वेळेत निदान करून योग्य उपचार घेतल्यास गंभीर गुंतागुंत टाळता येते, असे ते म्हणाले.
कार्यक्रमात मेड बेल ग्लोबलचे अध्यक्ष आणि प्रख्यात वैद्यकीय तज्ज्ञ डॉ. गिरीश सोनवळकर यांनीही मनोगत व्यक्त केले. त्यांनी मधुमेहाविषयी जनजागृती करण्यासाठी संस्था सातत्याने कार्यरत असल्याचे सांगितले.