परिवहनला न्यायालयाचा मोठा दणका ..!   केकेआरटीसीची बस करण्यात आली जप्त ..!

बिदर : बिदर न्यायालयाने मोठा दणका दिला आहे. कल्याण कर्नाटक राज्य मार्ग परिवहन महामंडळाची (KKRTC) बस जप्त करण्याचे आदेश दिले. 

 अपघातात मृत्यू झालेल्या महिलेच्या कुटुंबाला नुकसानभरपाई देण्याचा आदेश  न्यायालयाने  कल्याण कर्नाटक राज्य मार्ग परिवहन महामंडळाला दिला होता. मात्र,  कल्याण कर्नाटक परिवहन बिदर डेपोने नुकसानभरपाई वेळेत न दिल्याने बिदर न्यायालयाने परिवहनला मोठा दणका देत महामंडळाची एक बस जप्त करण्याचा आदेश दिला. त्यान्वये बस जप्त करून न्यायालयीन आवारात आणून ठेवण्यात आली आहे..

15 ऑगस्ट 2021 रोजी भालकी तालुक्यातील टेकणी गावाजवळ भीषण रस्ता अपघात झाला होता. या अपघातात रेखा सुनील (वय 35) या महिलेचा गंभीर जखमी होऊन मृत्यू झाला होता. त्यानंतर मृत महिलेच्या कुटुंबीयांनी नुकसानभरपाईसाठी न्यायालयात धाव घेतली होती.
या प्रकरणाची सुनावणी केल्यानंतर बिदर येथील अतिरिक्त जिल्हा व सत्र न्यायालयाने मृत महिलेच्या कुटुंबाला सुमारे 22.50 लाख रुपयांची नुकसानभरपाई देण्याचा आदेश केकेआरटीसीला दिला होता. मात्र, न्यायालयाचा आदेश होऊन तब्बल सात महिने उलटूनही महामंडळाच्या अधिकाऱ्यांनी संबंधित कुटुंबाला नुकसानभरपाई अदा केली नाही. त्यामुळे कुटुंबीयांनी पुन्हा न्यायालयाचे दार ठोठावले.
न्यायालयाच्या आदेशाचे उल्लंघन झाल्याचे गंभीरपणे घेत न्यायाधीशांनी केकेआरटीसीची बस जप्त करण्याचे आदेश दिले. त्यानुसार अधिकाऱ्यांनी तत्काळ कारवाई करत महामंडळाची बस जप्त करून ती बिदर न्यायालयाच्या आवारात आणून उभी करण्यात आली आहे.