महागाईविरोधात काँग्रेसचे केंद्र सरकारविरोधात आंदोलन : पेटविल्या चुली 

बेळगाव : वाढत्या महागाईविरोधात काँग्रेसने आज चन्नम्मा चौकात केंद्र सरकारविरोधात आंदोलन छेडले.  आंदोलनादरम्यान कार्यकर्त्यांनी चुल पेटवून स्वयंपाक करत इंधन आणि स्वयंपाक गॅस दरवाढीमुळे सर्वसामान्यांची होत असलेली होरपळ केंद्रास दाखवून दिली. 

वाढत्या महागाईमुळे सर्वसामान्य नागरिक, गरीब आणि मध्यमवर्गीय कुटुंबे आर्थिक संकटात सापडली असल्याचा आरोप करत काँग्रेसच्या कार्यकर्त्यांनी केंद्र सरकारविरोधात जोरदार घोषणाबाजी करीत निदर्शने केली.

दररोज पेट्रोल, डिझेल आणि घरगुती गॅसच्या किमती वाढत असून त्याचा थेट फटका सर्वसामान्य नागरिकांना बसत आहे. महागाई नियंत्रणात आणण्यात केंद्र सरकार अपयशी ठरल्याचा आरोप काँग्रेसच्या नेत्यांनी केला.
स्वयंपाक गॅस, पेट्रोल आणि डिझेलच्या किमती तातडीने कमी करून जनतेला दिलासा द्यावा. अन्यथा राज्यभर तीव्र आंदोलन छेडण्यात येईल, असा इशाराही यावेळी आंदोलनकर्त्यांनी दिला.

या आंदोलनात बेळगाव ग्रामीण जिल्हाध्यक्ष विनय नावलगट्टी, आयिषा सनदी, मंजुनाथ कांबळे, मोहन रेड्डी यांच्यासह जिल्हा काँग्रेस पक्षाचे पदाधिकारी, कार्यकर्ते तसेच विविध आघाड्यांचे प्रतिनिधी सहभागी झाले होते.