अंत्यसंस्कारावेळी हाणामारी :  दोघे गंभीर जखमी

बेळगाव : बेळगाव जिल्ह्यातील रायबाग शहरात अंत्यसंस्कारावेळी झालेल्या वादाला रक्तरंजित वळण लागले. मृत व्यक्तीच्या कुटुंबीयांवरच जावई व त्याच्या साथीदारांनी जीवघेणा हल्ला केल्याची घटना घडली आहे.
संतोष भोसले नामक व्यक्तीचे निधन झाल्याने कुटुंबीय अंत्यसंस्काराच्या तयारीत व्यस्त होते.
यावेळी कुटुंबातील जावई अभिषेक रवी माने, नंदू रवी माने (बेळगाव) तसेच इचलकरंजीचा आकाश माने, ओंकार भिसे तसेच काही महिला व इतर साथीदारांनी कुटुंबीयांवर हल्ला केला. वाद चिघळल्यानंतर आरोपींनी लाकडी दांडक्यांनी मारहाण केली. या हल्ल्यात काही जणांच्या डोक्याला गंभीर दुखापत झाल्याची माहिती मिळाली आहे. घटनेमुळे परिसरात काही काळ तणावाचे वातावरण निर्माण झाले होते.
हल्ल्यानंतर आरोपी घटनास्थळावरून फरार झाले. जखमींना तातडीने स्थानिक रुग्णालयात दाखल करण्यात आले असून त्यांच्यावर उपचार सुरू आहेत. ही घटना रायबाग पोलीस ठाण्याच्या हद्दीत घडली आहे.
या हाणामारीमागील नेमके कारण समजू शकले नाही. मात्र, अंत्यसंस्कारावेळी झालेल्या या जीवघेण्या हल्ल्याची रायबाग शहरात चर्चा  आहे.