भडगावजवळील पूल कोसळला :  गडहिंग्लज-नेसरी रस्ता बंद 

बेळगाव : महाराष्ट्रातील कोल्हापूर जिल्ह्यातील गडहिंग्लज नजीकच्या भडगावजवळ मुसळधार पावसामुळे पर्यायी पुलाचा काही भाग कोसळल्याची घटना घडली. या घटनेमुळे काही काळ वाहतुकीत अडथळा निर्माण झाला. मात्र, प्रशासनाने तातडीने उपाययोजना करत आजरा मार्गे वाहतूक पुन्हा सुरू केली आहे.

दरम्यान, गडहिंग्लज आणि आजरा परिसरात सुरू असलेल्या जोरदार पावसामुळे नद्या व ओढे दुथडी भरून वाहत आहेत. त्यामुळे गडहिंग्लज-नेसरी मार्गावर पाणी साचल्याने या रस्त्यावरील वाहनांची वाहतूक तात्पुरती बंद करण्यात आली आहे.

संबंधित विभागांकडून परिस्थितीवर बारकाईने लक्ष ठेवण्यात येत असून नागरिकांनी विनाकारण प्रवास टाळावा तसेच पावसाळी परिस्थितीत आवश्यक ती खबरदारी घेऊनच प्रवास करावा, असे आवाहन प्रशासनाने केले आहे.